Algun celebracion di dianan tradicional pa mustra aprecio y honor pa trabounan desplega den Husticia, a pasa e biaha aki casi pa olvido. Parlamentario Robert Candelaria ta lamenta e hecho aki y ta apela na gobernantenan pa duna merito y atencion na esunnan cu ta brinda servicio y añanan di dedicacion na nos pais.
A tuma nota cu fechanan di importancia manera Korpsdag di Cuerpo Policial Aruba, siman di Bombero como tambe fecha di Cuidadonan di Preso a pasa “bou luz di bela” y ta duna indicacion cu Husticia completo ta manera yiu sin mama.
Aunke nos pais, mescos cu mundo completo, ta pasando den momentonan dificil na man di un pandemia y cu medidanan riguroso pa locual ta trata organisa eventonan publico cu yen di hende, toch mester corda cu dianan di imporancia manera esakinan no por laga pasa bay sin mas.
Robert Candelaria di su banda ta comparti cu fechanan recordatorio ta importante pa e empleado, e cuerpo cu nan ta representa y e comunidad en general cu ta tuma fechanan asina aki pa uni na e dedicatorio y gradici tur esunnan cu ta pone nan bida na peliger y sirbi nan pais cu alma y curpa.
Contrario na e gobierno aki cu ta mustra un desinteres total na tur cu ta brinda servicio na e pueblo, e ta di pensamento cu fechanan asina ta momento pa uni e pueblo y aunke ta na un manera diferente, toch mustra aprecio y gratitud pa e trabou desplega. Mas ainda den un tempo di crisis cu nos ta aden.
Na cada un cu ta brinda nos e siguridad, e servicio y proteccion, pabien riba cada fecha conmemorativo y danki pa bo dedicacion.
