Home Politics Na memoria di un gran Arubiano, Francisco (Frido) Croes

Na memoria di un gran Arubiano, Francisco (Frido) Croes

SHARE

Cu honda pena y dolor partido MEP a ricibi e noticia di fayecimento di su ex-candidato sr. Francisco Walfrido (Frido) Croes. Sr. Croes a nace riba 3 di december 1957, ta casa y tin 2 yiu. Di profesion e tabata maestro di scol gradua na Arubaanse Pedagogische Academie (APA).

Riba peticion di lider di MEP sr. Nelson Oduber, Frido a aparece na aña 1989 pa prome vez como candidato nr. 16 riba lista di nos partido. Asina el a sigui aparece riba nos lista na 1993 (nr. 13), 1994 (nr. 12), 1997 (nr. 10) y 2001 (nr. 11). Un di su lemanan popular den su campaña politico tabata “Mas y mihor enseñansa”. Desde prome caba y na su entrada oficial den politica Frido a demostra su lealtad incondicional na su partido MEP.

Varios tabata e funcionnan importante cu Frido a ocupa durante su trayectorio den politica. Asina el a fungi como parlamentario (1989-1994), Presidente di Staten (2001-2004), Ministro di Enseñansa (2004-2005) y Ministro Plenipotenciario na Hulanda (2005-2009). Pues un carera impresionante cu a caracterisa e gran politico aki. Y tur e funcionnan aki el a ocupa cu hopi responsabilidad, capacidad, honestidad y integridad. Aunke cu Frido a retira despues for di politica activo, semper el a keda yuda partido MEP cu su consehonan valioso riba tur tereno pero specialmente riba tereno di enseñansa. Den partido MEP semper el a gosa di hopi aprecio y respet ya cu e tabata un politico integro cu ningun hende por punta dede riba dje.
Lamentablemente Frido durante algun tempo a sufri di un malesa y cu a conduci na su morto repentino na un edad relativamente hoben.

Su dedicacion y fieldad na nos partido lo keda pa semper graba den nos curason.
Frido, danki pa tur loke bo a haci pa bo pais y bo partido. MEP ta desea forsa na su señora Lourdes, yiunan Francis y Joseanny y demas famia.
Cu Frido sosega na paz den brasa di Señor.