Home International Carlo Acutis (15) ta e prome millenial cu a wordo beatifica na...

Carlo Acutis (15) ta e prome millenial cu a wordo beatifica na Assisi, Italia

SHARE

Carlo Acutis ta e prome millenial cu a wordo beatifica. Carlo Acutis a fayece na 2006, e tabata tin 15 aña y a fayece di Leukemia. Na Italia e ta conoci como Cyberapostel.

Papa Francisco, a encarga e Cardinal Italiano Agostino Vallini pa beatifica Carlo Acutis, esaki a sosode na Assisi.

Acutis tabata un hoben cu tabata proclama su fe extensamente via internet. E tabata uza su passion pa computer, pa traha websitenan catolico y asina tabata propaga e Envangelio.
Hopi lihe despues di su morto Acutis a bira e role model di hobennan creyente. Acutis su curpa a wordo balsama y riba su cara nan a pone un mascara di silicon. Carlo Acutis tabata biba na Milan y su deseo tabata pa wordo dera na Assisi.

Pa un persona wordo beatifica mester sosode un milagro, segun Vaticano esaki a sosode na Brazil na 2013, caminda un mucha cu tabata sufri di un abnormalidad raro na su pancreas, esaki a bin cura na 2013, milagrosamente despues cu su famia tabata resa hopi na Acutis.

Beatificacion di Acutis tabata planea caba den e luna di Juni, pero door di e consecuencianan di e Pandemia di Corona e la wordo posponi. E graf di e hoben, a wordo habri, 10 dia pasa y hopi creyente ta bishitando e Basilica di San Fransisco pa resa na e curpa balsama di e hoben.

Durante e beatificacion di Carlo Acutis, Papa Fransisco a dirigi su mes un biaha mas na e hobennan, mescos cu den pasado e la haci na varios ocacion caba y ta adverti e hobennan di e peligronan di Internet y e fake newsnan.