For di aña 2018, pa ta exacto ariba Mundial di Awa, Gobierno di Aruba y WEB Aruba a firma un acuerdo pa explora e posibilidadnan pa ofrece awa special pa agricultura na un tarifa reduci. Como parti di e esfuerzo aki, e Titular di e Cartera di Sector Primario, sr. Chris Romero, conhuntamente cu Prome Minister, sra. Eveline Wever-Croes, a tuma e tarea pa busca un solucion factible pa distribucion di awa pa agricultornan local na un tarifa mas abou cu esun actual. Di e manera aki nos agricultornan lo por tin tin un producion di cuminda cu un meta comercial.
Hunto cu WEB Aruba, a inventarisa tur e aspectonan cu ta influencia e disponibilidad di awa agricola. Asina a explora kico ta e calidad y cantidad minimo rekeri pa awa agricola. E proceso a tuma su tempo pero finalmente e trabounan a keda cla y por haña un bista di e recurso y infrastructura actual di agricultornan pa ricibi awa na un tarifa special, y cual ta un awa di bon calidad y controla pa WEB NV.
Un actor importante den realisacion di e proyecto ta e Departamento di Agricultura, Cria y Pesca (Santa Rosa), cual for di cuminsamento a aporta cu datos y calculonan. Santa Rosa lo ta encarga cu e registro y control di produccion pa cada projecto. E acuerdo aki a bira un realidad awor y esaki sigur ta un noticia sumamente positivo y cu ta papia di e esfuerzo di Minister Chris Romero pa fomenta desaroyo di Sector Primario como un pilar economico, entre otro di agricultura y criansa di bestia local.