Home » 4 y 5 aña di prison exigi pa duo cu a haci asalto arma den hotel

4 y 5 aña di prison exigi pa duo cu a haci asalto arma den hotel

by Admin
0 comment 54 views

ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e homber Venezolano E.D.P. y e homber Arubiano L.G., kendenan ta wordo sospecha di a haci un asalto arma den un joyeria na Ritz Carlton Hotel.

Aruba Native por a compronde cu Fiscal a exigi 4 y 5 aña di prison pa nan. Fiscal ta haya nan culpable di e asalto arma cu a sosode 4 Januari 2020 den un joyeria na Ritz Carlton Hotel.

Hues, via video conference, a mustra cu un di e personanan den e joyeria, e guardia di seguridad, a core tras di un di e asaltantenan. Esey tabata esun largo bisti cu barba di Santa Claus. E guardia a mira cu e asaltante a kita e barba tira afor y tira algo den e awa di saliña net banda di e hotel. E asaltante largo, kende despues a resulta di ta L.G., a logra huy. Polis a logra detene E.D.P. den mondi den e saliña. El a admiti di a haci e asalto arma y tabata cu un otro. E no tabata sa kende e otro persona ta. El a bisa cu ta un conoci a pidi’e pa haci e asalto arma y den auto ya tabata e homber cu barba di Santa Claus bisti. Polis a haya e barba di Santa Claus y un paña blauw cu e persona a laga atras. Tambe a haya un cantidad di joyas. A bay busca den saliña y a haya un pistol di nikkel cu bala. Esnan den e joyeria a bisa cu e persona largo tabatin un pistol color di nikkel.

Hues a mustra cu Recherche a haci investigacion y a haya DNA di L.G. riba e barba di Santa Claus. L.G. a bisa cu e no tin nada di haci cu e caso aki. El a bisa Hues cu por ta el a mishi cu algo y a haya su DNA y awor ta purba di culp’e. Hues a bisa cu anterior Polis a haya tip cu L.G. lo ta envolvi den un asalto arma.

Hues a bisa cu Recherche a haya tip cu L.G. lo ta envolvi den un asalto y tabata scucha cellular. A scucha combersacionnan di mama di L.G. algun dia despues di e asalto na Januari 2020 cu L.G. su partner. E mama lo a bisa e partner cu e ta sospecha cu L.G. lo ta envolvi cu e asalto na e joyeria na Ritz Carlton. E partner a bisa cu e ta haya straño pasobra L.G. no tabata na cas.

E Venezolano E.D.P. a yega Aruba na November 2019 ilegal den boto. Segun E.D.P. ta un amigo a acerk’e pa haci’e y el a accepta. Hues a remarca cu ta inexplicable cu den un periodo di 2 luna cu E.D.P. ta ilegal na Aruba, e ta bay haci asalto arma.

Hues a bisa cu e joyeria a haci demanda di casi 300 mil florin di joyas cu a wordo horta. A haya algun joyas den saliña pero falta.

Fiscal a bisa cu Aruba sacudi door di asalto arma na Ritz Carlton Hotel. Fiscal ta haya legalmente proba cu E.D.P. y L.G. a haci e asalto arma. Na opinion di Fiscal, e caso aki ta hopi serio y ta afecta nos turismo. Net den un hotel esaki ta sosode. Fiscal a exigi 4 aña di prison pa E.D.P. Pero pa L.G. el a exigi 5 aña di prison pasobra e tabata e cabezante. Hues, despues di a scucha e abogadonan, a sera tratamento di e caso y a bisa cu dia 30 October 2020 lo tin sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio