MACUARIMA, ARUBA: Den un ocasion special pa celebra y duna honor na mr. Alex Boekhoudt su ultimo dia di trabou na strand politie coleganan di diferente departamento di KPA a yega hunto pa asina prepara un Drive By di despedida pa sr. Boekhoudt. Pa motibonan di reglanan di COVID-19 a busca un otro manera pa bisa ayo na un persona cu a dedica 38 aña sirbiendo su pais como polis.
Alex mihor conoci como “Buki” a drenta Cuerpo Policial na aña 1981. Semper Alex tabata interesa den e trabou di polis y no a duda pa inscribi mesora e tempo ey na warda di polis na Oranjestad. “Tabata den luna di September cu mi mester a switch mi curason di burger pa polis, paso esey ami tabata kier” y asina a cuminsa un trayectoria largo di 38 aña den nos Cuerpo Policial.
E momento cu ela haya su buki di e tempo ey Korps Politie Nederlandse Antillen cu tur e proceduranan necesario pa bira polis, Alex su lus a cende y nunca e no a paga. Manteniendo su mes na reglanan di trabou y tambe ta INTEGRO a hiba cu Alex a mira diferente cambio cu Aruba a pasa aden. For di Korps Politie Nederlandse Antillen (KPNA) pa Korps Politie Aruba (KPA), Alex a mira y cana hunto cu comunidad y a experencia diferente cambio cu Aruba a pasa aden. Alex a traha den diferente departamento di KPA y tin un amplio experencia den esaki nan.
Amplio experencia y dedicacion ta cuminsa cu disciplina. Alex tabata semper tabta yega trempan na trabou y te cu awe riba su ultimo dia Alex a yega pa 6o’r mainta na Strand Politie. Semper Alex ta habri e warda , prepara un bon coffie pa e personal y pa despues sinta hunto brief tur personal prome cu e warda cuminsa opera. Asina tambe cu respet pa tur colega Alex no tabata simplemente un wachtcommandant pero a bira un Tata den Cuerpo Policial Aruba. Tur studiante cu a pasa den man di Alex, a siña conoce un poco mas kico ta e tarea di un polis y awe e studiantenan aki ta den un funcion halto y importante den KPA. Alex ta agradecido y satisfecho cu e por a hiba un maneho caminda e ta mira bek cu e simiya cu ela planta awor ta sacando su fruta y cu e frutanan aki cu ta keda atras, lo hiba KPA den un bon rumbo.
