ORANJESTAD – E homber J.A.C. a scucha Hues bisa cu e no ta haya castigo di prison pasobra Hues ta haya cu el a actua den defensa propio. Aruba Native por a compronde cu Hues ta di acuerdo cu e punto di bista di abogado mr. Illes kende a bisa cu su cliente a actua den defensa propio contra un grupo di 4 persona cu a atak’e y cu den esaki, J.A.C. a corta e homber S. cu un sker.
Tratamento di e caso aki a sosode via video conference, caminda Fiscal a acusa e homber J.A.C. di intento di mata e homber S. riba 15 Juni 2020. E sospechoso a splica Hues cu den e parkinglot dilanti Surf Side caminda tin e barnan, e problema a cuminsa. A surgi un discusion y hasta tenemento di otro, ora cu J.A.C. a bay cuminda un dama cu tabata para hunto cu e homber S. Cos no a bay for di man pasobra net Polis a yega pa core cu tur hende for di eynan relaciona cu medida di Corona Virus y cu ningun hende por ta laat riba caya.
J.A.C. a sali bay pero despues a topa cu S. y kier a bay papia cu S. pa evita mas problema. S. tabata cu 3 otro amigo y nan a bay riba J.A.C. cu bate y boter.
J.A.C. e momento ey a habri un tas cu e ta cana cun’e cu su cosnan di barbero y a saca un sker cu e ta corta cabey cun’e. E tabata zwaai e sker pa tene e grupo riba un distancia. Den e zwaaimento, el a corta S. E ora tur hende a bay mira kico a pasa cu S. y J.A.C. a core bay warda di Polis. El a bisa Polis kico tur a pasa y di biaha patruya a sali pa busca e grupo. Polis a logra detene tur cuater y hiba nan warda di Polis. J.A.C. a bisa Hues cu ningun momento e tabatin intension di hinca S. y ta den e zwaaimento cu e sker el a corta S. El a bisa cu el a haci esey pa defende su mes contra e grupo.
Fiscal ta haya cu enberdad no por papia di intento di asesinato sino maltrato cu arma. Fiscal a bisa cu e ta compronde cu ta e grupo a busca problema cu J.A.C. pero ta haya cu no tin defensa propio. Fiscal ta haya cu J.A.C. mester a core bay y no bay enfrenta e grupo. Mirando cu e heriba cu S. a sufri no tabata serio, Fiscal a exigi 220 dia di prison di cual 110 dia ta condicional cu un tempo di prueba di 2 aña. Esey ta haci cu J.A.C. lo sali liber e mesun dia.
Abogado mr. Illes a bisa Hues cu e ta haya cu su cliente J.A.C. a defende su mes contra e grupo. E abogado a bisa cu contrario na punto di bista di Fiscal cu J.A.C. mester a core bay, ley ta bisa cu ora un persona ta wordo ataca, e tin derecho di defende su mes. Na opinion di abogado mr. Illes, ta hustamente esey ta loke J.A.C. a haci. E abogado a sigui bisa cu J.A.C. no a haci di mas den su accion di defensa. E abogado a conclui cu J.A.C. a actua den defensa propio y mester lag’e liber.
Hues a sera tratamento di e caso y dicta sentencia di biaha. Hues ta haya cu enberdad J.A.C. a wordo ataca pa e grupo. Hues a bisa cu contrario na punto di bista di Fiscal, e ta haya cu segun ley si bo wordo ataca bo por defende bo mes. Hues a comparti punto di bista di abogado mr. Illes cu J.A.C. no a haci di mas. Pesey Hues a honra e defensa propio y a declara cu no ta persigui J.A.C. o sea cu e no ta haya castigo di prison. Hues a ordena pa e mesun dia J.A.C. wordo laga liber.