Home Sports Gregory Milliard ta firma cu Bellator MMA y ta bay entrena cu...

Gregory Milliard ta firma cu Bellator MMA y ta bay entrena cu Team Alpha Male

SHARE

ORANJESTAD – Cambionan grandi y positivo ta presentando den e carera di atleta local Gregory Milliard. Durante un conferencia di prensa diaranson atardi na Sandra’s Garden, e atleta di Mixed Martial Arts (MMA) a anuncia cu, entre otro, el a firma un contract cu Bellator MMA pa un periodo di 1 aña y 4 pelea di nivel internacional. Esaki ta haci di Milliard, e prome bringado Arubiano pa firma cu e compania internacional aki. E contract nobo aki ta nifica cu e pelea cu tabatin programa pa november, na Atlantic City, no ta bay door mas.
Dia 17 di october proximo, Milliard lo ta biahando pa California, USA pa cuminsa cu su entrenamento, cu riba su mes ta otro gran logro pa e deportista. T’asina cu e grandi di MMA Urijah Faber a acerca Gregory Milliard cu un invitacion pa forma parti di su prestigioso ekipo, esta ‘Team Alpha Male.’ Durante aproximadamente 3 siman, Milliard lo ta entrenando na nan sede ubica na Sacramento, California.
E preparacion pa Gregory Milliard su gran debut den Bellator MMA ta posibel danki na e apoyo cu ta ricibi for di Tropical Bottling Company, cu kende a firma un contract algun siman atras como representante di e marca Malta Balashi. Milliard ta sumamente gradici pa e sosten di Malta Balashi cu, como compania local, ta reconoce e potencial den su persona pa hiba nomber di Aruba na e nivel mas halto di MMA y ta apoya nos atletanan.
Bellator MMA ta un compania Mericano di promocion di Mixed Martial Arts; un di esnan mas grandi na mundo y e di dos mas grandi na Merca. Bellator MMA ta organisa y promove eventonan cu audiencia di 1 biyon persona na 160 pais y ta cay bou di grupo di media ViacomCBS. Nan tin algun di e figuranan mas conoci den mundo di MMA manera Tito Ortiz, Cris ‘Cyborg’ Justino y Quinton ‘Rampage’ Jackson.
Gregory Milliard a duna di conoce cu, aunke su contract cu Bellator MMA ta cuminsa oficialmente na januari 2021, e compania a duna di conoce cu e mester keda ‘stand by’ pa na cualkier momento e wordo yama aden pa un pelea. Milliard ta sinti cu e ta cla pa e reto aki su dilanti y e momento a yega pa mustra mundo kico bringadonan di Aruba tin aden.
Tambe ta tuma e oportunidad pa gradici e ayudo balioso cu semper ta ricibi for di companianan local para su tras manera Fast Delivery, Cuminda na Cas, Print Shop, Giannis Group y Aruba TV. Por ultimo, ta invita Aruba en general pa sigui su pasonan na su prome gran pelea cu Bellator MMA atrabes di su cuentenan di media social.