ORANJESTAD – E caso di traficacion di mas cu 5 mil kilo di cocaina riba un barco, awor ta bira mas interesante. Esaki pasobra un di e sospechosonan a papia. Aruba Native por a compronde cu promer e 11 sospechosonan a bisa si no sa di nada di e droga. Sinembargo algun siman promer cu e caso a bin dilanti diabierna ultimo, un di e sospechosonan a dicidi di papia.
Durante tratamento di e caso cu tabata pro forma, e sospechoso M.D. a reclama cu e no a tende di autoridad y con a para cu e proteccion cu a priminti’e.
E momento ey Fiscal a bisa Hues cu mas o menos luna pasa e sospechoso M.D. a bisa cu e ta dispuesto di papia pero mester garantiza proteccion pa su famia. Fiscal a bisa cu a papia cu autoridad di Montenegro cu a bisa cu nan no tin proteccion di testigo pero ta dispuesto pa tene bista riba e famia. A notifica agencia anti droga na Montenegro cu ta tene bista. Fiscal a enfatisa cu no tin ningun acuerdo cu M.D. Fiscal a bisa cu e ta dispuesto pa tuma contacto atrobe cu autoridad di Montenegro pa bisa cu M.D. no a tende nada di nan ainda. Por mira cu M.D. no tabata mucho contento y a cana bay for di e oficina na KIA.
Esaki ta haci cu awor lo bay confronta tur e otro 10 sospechosonan. E hecho cu M.D. ta pidi proteccion ta mustra cu e sa cu bida di su famia ta core peliger. E caso a keda pospone pa 29 Januari 2021.