Parlamentario Shailiny Tromp-Lee ta indica cu e cifranan ta papia pa nan mes. Prolongacion di FASE tabata necesario. Na April di e aña aki, momento cu ainda no tabatin subsidio di salario, 10715 persona a haya FASE. E cantidad aki a baha asina cu Gobierno a cuminsa duna subsidio di salario pa percura pa mas tanto trahador por keda manteni na pia di trabou. E siguiente cifranan ta conta pa e cantidad di persona cu a haya FASE: Mei 5435, Juni 5688, Juli 4433, Aug 3591 y sept 2704. Mirando cu e cantidad di persona cu ta depende riba FASE toch ta halto ainda y hopi persona a acerca miembronan di Fraccion di MEP cu nan preocupacion, a keda dicidi pa manda un carta pa Gobierno.
Peticion specifico di Fraccion di MEP tabata pa prolonga FASE cu 3 luna mas. Diabierna ultimo e peticion aki a keda aproba den Conseho di Minister. FASE a keda prolonga te cu fin di December.
Segun Tromp-Lee un gradicimento na Gabinete Wever-Croes, muy en particular Minister Glenbert Croes ta na su lugar. Minister Glenbert Croes a percura pa e carta aki subi mesora riba agenda di Conseho di Minister y a percura pa e keda aproba. Un decision cu un biaha mas ta demostra cu pa Gabinete Wever-Croes e hende ta central, dunando oido na preocupacion di un grupo grandi den nos comunidad.
Segun Tromp-Lee pueblo mester tuma bon nota: TUR luna mester aplica di nobo. Cu otro palabra, contrario na e proceso conoci, esnan cu ta haya FASE (trahado of ZZP’er) mester aplica tur luna, prome cu dia 10 di e luna, pa por ricibi e yudansa financiero aki di gobierno. Di awe, 5 di Oktober te cu dia 10 di oktober 2020 bo por haci bo peticion.
Parlamentario Tromp-Lee ta manda e siguiente mensahe na pueblo: Aplica na tempo y percura pa yena e formulario manera indica. Sigur mester percura pa tur e documentacion necesario keda presenta. Asina bo ta garantísa cu e proceso ta bay liher y bo por haya e yudansa cu bo tin mester.