Recientemente e titular di e Cartera di Sector Primario, sr. Chris Romero, a pasa bishita algun dam rond di nos isla pa asina mira e cantidad di awa cu a keda acumula despues di e yobidanan. Minister Romero a keda sumamente satisfecho di por a aprecia e cantidad di awa cu a keda colecta y con yen e damnan ta awor. Esaki sigur ta un beneficio grandi pa nos cunukeronan principalmente.
E parti positivo di e coleccion di awa aki ta cu Santa Rosa/DLVV lo por garantisa por lo menos 8 pa 10 luna di awa pa nos Cunukeronan cu ta cumpra truck di awa. Pero e beneficio ta tambe pa esnan cu ta busca awa cu tanki di 1000 liter pa muha nan plantancion of pa criansa di bestia.
“E ta sumamente gratificante pa mira e beneficionan cu yobida ta laga atras pa nos naturalesa y Sector Primario den general. Nos tin di pone di nos parti tambe pa conserva y preserva nos damnan, pa asina nos cunukeronan y criadornan di bestia por sigui eherce nan trabou den beneficio di nos comunidad”, tabata palabranan di Minister Romero durante su bishita na Dam di Rooi Afo.
