Recientemente, Minister Chris Romero, titular di e Carteranan di Transporte, Comunicacion y Sector Primario, a tene un reunion introductorio cu sr. Rendell de Kort, kende ta un economista local reconoci. Presente na e reunion aki tambe tabata sra. Nathalie Maduro, Directora di Santa Rosa/DLVV unda cu a combersa riba un estudio tocante siguridad alimentario cu Banco Mundial ta preparando pa Aruba, como parti di e programa di asistencia tecnico pa financiamento di risico di desaster den islanan y teritorionan di Caribe. E asistencia tecnico tin como obhetivo mas amplio pa mehora e resiliencia na largo plazo, y e capacidad di adaptacion pa adapta na eventonan natural extremo y recurente, den beneficio di esnan mas vulnerabel.
E proyecto, den forma di estudio y plan strategico, ta parti di e programa financia pa Union Europeo pa e “Sustainable Energy and Marine Biodiversity Program”, (RESEMBID), implementa pa Expertise France, Banco Mundial y Global Facility for Disaster Reduction and Recovery (GFDRR).
E restriccionnan imponi pa prevencion di contagio cu COVID-19 a haci cu un ekipo di experto di Banco Mundial no tabata por a bishita Aruba personalmente pa asisti na e reunionnan, pero a sa di mantene hopi consulta virtual cu e apoyo y experticio den e materia di sr. de Kort, kende ta traha como consultor di Banco Mundial, como parti di un ekipo dirigi pa e specialista den analisis di risico di desaster, Mary Boyer.
Sr. de Kort a duna un splicacion di e trabou completo cu e ekipo di Banco Mundial ta bin ta prepara cu e coperacion amplio di Departamento di Asuntonan Economico, Comercio y Industria, cu a fungi como punto focal, y Departamento di Agricultura, Cria y Pesca. Den marco di e vision y deseonan di Gabinete Wever-Croes, cu ta inclui recomendacionnan pa fortalece siguridad alimentario, como parti primordial pa logra un desaroyo y structura fortaleci den Sector Primario na Aruba.
Minister di Transporte, Comunicacion y Sector Primario, sr. Chris Romero, a keda hopi satisfecho di mira e compromiso y coperacion entre e dos departamentonan cu ta bin ta trahando hunto pa hopi tempo den diferente programa y strategia pa apoya y educa nos comunidad local na con pa ta mihor productor y di manera sostenibel.
Diamars proximo e comision lo presenta nan programa y resultado di e estudio, y lo ta entregando un informe final na Conseho di Minister.
