Oranjestad, 5 di october 2020, Stichting Parkietenbos a reuni cu Minister Marisol Lopez Tromp y tur e expertonan di e departamentonan concerni relaciona cu e problema di dump di Parkietenbos y maneho di desperdicio na Aruba. Durante di e reunion e fundacion a expresa un biaha mas nan malcontento pa e echo cu ainda tin candela ta tumando lugar riba e dump y recientemente un candela hopi grandi a sosode cu a causa hopi molester den e bario. Ultimo temponan biento ta cay y sin biento e gas toxico di e dump ta penetra den e casnan mas cu antes y ta causa molester di holo malo, problema di salud y peliger di explosion pa e habitantenan. PAHO a señala cu e dump mester wordo sera pasobra cu e ta un menasa pa salud di e barionan pero ainda tin candela ta tuma lugar y for di control.
E miembronan di e fundacion a expresa nan apoyo pa e idea pa exporta mayoria parti di e desperdicio di Aruba pa exterior, basta e bay pa un pais cu ta uza e desperdicio den forma di envirobales den forma sostenibel, pues bon pa medio ambiente.
Di parti di Minister Lopez Tromp y su expertonan a haci presentacion di e incenerator y DVG a splica cu e emicion di contaminacion di e incenerator lo ta casi nulo ya cu e incenerator ta tin e tecnologia di mas moderno y di e calidad mas halto di filters pa elimina e contaminacion. E fundacion a expresa su preocupacion pa sa cua instancia lo bay supervisa y controla cu e incenerator pa e keda funciona optimalmente na tur momento.
Pa loke ta e incenerator e fundacion lo keda pendiente pa e testnan cu lo mester wordo haci pa asina comproba di berdad cu e ta funciona corectamente mehorando e calidad di aire den e bario. Despues di hopi aña di participa na reunionnan y despues di entrega mas di 2000 Firma di habitantenan di e barionan, Stichting Parkietenbos ta contento cu e dia cu e bario por hala rosea di aire limpi atrobe ta mas cerca. Sinembargo e lucha ta sigui te dia cu no ta kima mas y cu e seru di e dump wordo reduci y tapa responsablemente pa semper. Ta asina so por recupera aire di calidad pa e barionan y e calidad di bida marino den e lagoen.
