Diadomingo anochi Premier Evelyn Wever-Croes a hiba un discurso nacional a traves di canalnan di television, radio y medionan social cu ta duna perspectiva y speransa. Awor den e prome dianan di un luna nobo, cu hopi expectativa, Premier Wever-Croes a para keto na e desaroyo den e ultimo luna, y a duna un perspectiva pa e lunanan nos dilanti. Segun Premier den bida semper nos mester tin perspectiva.
COVID:
Pa loke ta trata e crisis di Covid-19, desde luna pasa pa awor nos por mira un desaroyo positivo ta manifestando. Den september nos a mira un piek di 1630 caso activo, y dia 31 di september tabata tin 677 caso. Awe nos tin 517 caso activo. Premier a pidi comunidad sosten pa sigui baha e cantidad di caso activo. Aruba a logra e reduccion substancial aki di casonan activo principalmente pasobra a introduci medida mas estricto, y a aumenta control. Entre e medidanan mas estricto ta por ehempel cu e orario di toque de queda a bira mas trempan, 10.00 pm. Tambe a haci uzo di tapaboca obligatorio den tur establecimento y oficina. No tabata facil pa ehecuta e medidanan, hasta tabata tin protesta, pero awor por mira cu e medidanan ta necesario den interes general di nos pais, y cu ta dunando resultado positivo, y p’esey awor por considera cual medida por cuminsa flexibilisa. Tambe Crisisteam a intensiva control di cuarentena y isolacion. Tur hende ta wordo controla, y nan ta ricibi asistencia si mester. Y si nan no ta na cas, ta haya multanan cuminsando na 1.000 florin.
DESAROYO ECONOMICO Y FINANCIERO:
Premier a subraya cu ta hopi importante pa baha e cantidad di casonan activo na Aruba, pa asina nos por bay bek na e normalidad nobo. Tursimo a cuminsa desaroya y turistanan kier bolbe Aruba. Pero e casonan activo halto ta stroba esaki. Si baha e casonan activo, por atrae mas turista, y asina por crea mas empleo. Tambe tin e desaroyo entorno e refineria, cu ta bayendo den direccion positivo, cu tambe ta bay crea cupo di empleo.
Premier Wever-Croes a splica tambe cu ta sigui den negosacion cu Hulanda pa por yega na financiamento, y cu e negosacionnan ta bayendo bon. Mientras tanto Gobierno a logra financia 170 miyon localmente a traves di e bononan cu a wordo emiti, y a gradici tur esnan cu a cumpra e bononan. Premier a anuncia tambe cu Gobierno awor por prolonga FASE, subsidio di salario y e asistencia financiero na empresanan mediano y chikito, y ta spera cu esaki por trece trankilidad.
GRADICIMENTO: Premier a gradici comunidad cu a demostra disciplina y a gradici e ekipo profesional di frontliners, especialmente riba tereno di cuido y den mantene orden publico. Tambe Premier a gradici esnan cu ta traha den horeca, cu apesar di e riesgonan cu nan trabou ta trece cu ne, ta haci lo maximo pa e turista sinti’e na cas. Na final di e discurso inspirativo, Premier a pidi tur ciudadano pa pone diferencia un banda, pa no recuri na negativismo y menasa, pero pa corda cu e pais aki ta di nos tur, y ta nos tur hunto mester hiba e pais aki padilanti. “Pasobra nos ta stima nos mes, nos ta stima nos famia y principalmente pasobra nos ta stima Aruba”.