ORANJESTAD Aruba, 05 oktober 2020. Awe dialuna 5 di oktober por bisa cu ta 2 luna pasa cu Aruba a constata e prome casonan di Covid-19 cu a inicia den “night life” y cu a escala den un brote grandi di Covid-19 na Aruba.
Den luna di augustus nos a conose 1863 caso positivo nobo di covid, di un total di 13547 test haci di cual “positivity rate” tawata varia entre 30% y 40% y a constata 7 morto.
Den luna di september nos a conose1845 caso nobo di covid, di un total di 10108 test haci di cual “positivity rate” ta varia ente 20% y 35% y a constata 17 morto.
Si tuma nota di e graficonan por nota cu e prome dos simannan di september ta mantene e mesun patron di augustus. Den e di tres siman di september rond di 22 di september ta surgi un caida den casonan positivo y “positivity rate” cu ta manteniendo su mes stabiel.
Apesar di ta nota e reduccion den caso positivo y reduccion den “positivity rate”, ta nota tambe reduccion den peticion pa test. Esaki por tin 2 motibo sea cu no tin hopi persona mas cu sintoma of cu e sintomanan ta asina leve cu e persona no ta sinti e nesesidad pa test, pero cu si por trece otro persona den peliger di infeccion.
Dr Horacio Oduber Hospital tambe ta informa cu nan ta ricibiendo varios persona cu ta yega sercanan pa asistencia medico cu sintoma di Covid sin cu a pidi asistencia serca dokter di cas den un fase mas trempan.
P’esey ta hopi importante pa nos sigui cuida y cumpli cu e medidanan di proteccion cu ya ta conoci pa comunidad completo y na momento cu tin sintomanan di covid-19 cu por ta paresido na griep, no duda y tuma contacto cu dokter di cas pa un test.
Solamente cu determinacion, curashi y positivismo nos lo ta fuerte pa maneha y controla covid-19. Ta nos mester controle y no permiti nos wordo controla pa e virus. Esaki nos por haci solamente door di sigui cuida continuamente.
Aruba ta conta cubo!