ORANJESTAD – Minister Maduro a participa durante dos dia na e di XII Council of Ministers Meeting di Caribbean Financial Action Task Force (CFATF) cu e aña aki a tuma luga di un forma virtual.
CFATF ta e organisacion di 25 Pais den Caribe, Central y Sur America cu ta traha hunto pa combati labamento di placa y financiamento di terorismo manera stipula den e recomendacionnan di e organisacion mundial Financial Action Task Force (FATF). Durante e reunion aki e Ministernan di e Paisnan miembro y nan representantenan ta tuma decision riba entre otro e programa di trabao cu CFATF lo ehecuta den2020/2021.
Pais Aruba ta bay forma parti di Steering Group
E mandatario ta informa cu durante e di XII Council Minister Meeting a anuncia cu Pais Aruba ta bay forma parti di e Steering Group di CFATF den representacion di e ‘Dutch speaking members’ di e organo aki cu ta dirigi e trabou cu ta wordo haci pa CFATF. E Paisnan cu ta ‘Dutch speaking members’ di CFATF ta Aruba, Corsow, Sint Maarten y Suriname. Aruba lo asumi e responsabilidad aki di november 2020 pa november 2022.
Evaluacion di Pais Aruba posibelmente posponi pa tercer kwartaal di 2021
Otro punto di agenda cu a ser trata ta e evaluacion di e Paisnan den 2020 cu debi na e pandemia no por a sigui conforme e programa di CFATF. Pa e motibo aki a propone pa e miembronan bay de acuerdo pa pospone e evaluacion di e Paisnan cu un aña pendiente e decision final di e Plenaria di FATF cu ta e organo mundial cu ta stipula e recomendacionnan pa preveni y combati labamento di placa y financiamento di terorismo. Pa Aruba esaki lo significa cu e evaluacion cu mester a tuma lugar e luna aki, awor lo tuma lugar den e di 3er kwartaal di 2021.
Importante pa Aruba sigui mantene integridad financiero
Aruba ta un di e prome Paisnan den Caribe cu ta afilia na CFATF y semper ta participa activamente cu trabounan di CFATF. Minister Xiomara Maduro ta enfatisa cu ta importante pa Aruba sigui mantene e integridad di e sistema financiero di nos Pais y pesey ta gradici tur instancia na Aruba cu ta haci nan esfuerso riba e tereno aki, specialmente e team di Departamento di Legislacion cu ta asisti e mandatario den e reunionnan.
