ORANJESTAD – Awe mainta Corte di Husticia di Aruba a trata e caso penal cu Ministerio Publico a cuminsa contra 11 sospechoso, kendenan tabata abordo di e barco di carga caminda a haya mas cu 5000 kilo di cocaina. Aruba Native por a compronde cu tratamento di e caso a keda pospone te otro aña.
Awe mainta Corte di Husticia a haci uso di e sistema video conference y tambe sistema di audio. Via e sistema di auto tabata scucha e traductor na Hulanda cu ta papia e idioma Servio. Via video conference por a mira e abogado Hulandes, tur e 11 sospechosonan den KIA. E sospechosonan tabata wordo hiba den grupo di 3 den e oficina caminda tin e systema di video conference. Esaki pa mantene e distancia social y tambe tur cu mascara bisti. Tur e sospechosonan ta di Montenegro cu ta keda banda di Grecia.
TRADUCTOR DI HULANDA Door cu e mayoria di e sospechosonan no ta papia ningun otro idioma cu ta Servio of e idioma di nan na Montenegro, Ministerio Publico a pidi asistencia di e traductor Hulandes. E procedura di interogacion tabata dura hopi ya cu ta via video conference tabata comunica cu e traductor na Hulanda y e mester a traduci loke e agentenan di Polis, abogado, Fiscal y Hues Comisario tabata puntra e sospechosonan y despues traduci kico e sospechosonan tabata bisa.
LOTE DI COCAINA Fiscal a acusa e grupo di traficacion di mas cu 5000 kilo di cocaina. Dia 25 Februari 2020, Guarda Costa a intercepta e barco di carga cu tabata den awa territorial di Aruba. E barco a sali for di Venezuela cu destrino Grecia.
Ayera a keda palabra cu ta pospone e caso pa Januari 2021. A palabra cu e abogado Hulandes cu e lo mester ta na Aruba pa tratamento di e caso, caminda e ora ey lo haci uso di e traductor Hulandes via e sistema audio. Tur e 11 sospechosonan ta keda encarcela den KIA pendiente tratamento di e caso.