Home Politics Parlamentario Dellanire Maduro Kehonan riba Dump/Parkietenbos ta data for di añanan...

Parlamentario Dellanire Maduro Kehonan riba Dump/Parkietenbos ta data for di añanan 80 y mester haya un solucion definitivo

SHARE

 

 

Lider di fraccion di POR den Parlamento, Dellanire Maduro a comenta cu Dump/ Parkietenbos tin mas di 60 aña di existencia y desde añanan 80 habitantenan di area di Parkietenbos tabata expresa nan disgusto pa cu e situacion di holo, bestia y huma cu tabata reina den nan bario for di e tempo ey caba.

Diferente articulo den corant tabata elabora riba e kehonan pa loke ta djaca, cachonan los, sangura y musca entre otro y por a ripara cu ya caba pa mas di 40 aña a bin ta pidi pa solucion duradero pa maneho di desperdicio.

El a comenta esaki durante su disertacion den primera tanda den reunion publico atendiendo e tema di Parkietenbos y Incinerator chikito diaranson. Mayoria di e puntonan presenta door di e parlamentario ta basa riba e estudio haci door di Pan-American Health Organization (PAHO) na 2018 cu a haya e titulo: “Evaluación del Manejo de residuos sólidos urbanos y comerciales en Aruba”.

E rapport aki ta menciona diferente punto di preocupacion, pero tambe consehonan y puntonan di accion pa por logra soluciona e situacion existente y evita cu e lo por empeora den futuro. 

Entre e puntonan cu e parlamentario a menciona ta cu e residuonan (sludge) di e planta di tratamento di awa cu ta wordo deposita na Parkietenbos ta representa un riesgo biologico y te hasta tin potencial toxico. Tambe cu den e maneho di residuonan hospitalario extra no ta cumpli cu e temperaturanan adecua di incineracion y no tin e sistemanan di tratamento di emisionnan, ademas nan mester tratamento diferente door di cual nan mester wordo diferencia na e fuente di origen. 

Tambe Maduro a indica cu salud di diferente persona ta den riesgo, for di esnan cu ta traha riba dump mes te habitantenan den cercania. E rapport di PAHO ta bisa cu no tin estadistica di e personanan afecta, lo cual no ta permiti evalua e magnitud di e problema, algo cu ta lamentable segun Dellanire Maduro, pasobra ta conoci cu tin personanan cu ta sufri di un of otro enfermedad debi na e situacion di Parkietenbos.

Den e instrumento di planificacion PAHO ta recomenda pa incorpora e siguiente aspectonan: Proteccion di ambiente y salud publico, baloracion di desperdicio, economia circular, responsabilidad extendi di e productor, responsabilidad comparti, participacion di e poblacion den e sistema di maneho di desperdicio incluyendo e pago di e servicionan y  infrastructuranan eficiente pa futuro.

Esaki lo permiti reduci substancialmente e desperdicionan cu ta wordo trata of ta yega e luga di disposicion final, ya cu e desperdicionan solido a aumenta den volumen di produccion  y a varia den calidad, door di cual, e accionnan cu wordo tuma lo mester ta orienta pa wordo probecha un biaha mas al maximo, man den man cu un reduccion maximo di su produccion, ya cu solamente mester observa e proyeccion relaciona cu e residuonan solido genera pa e poblacion di Aruba den e proximo 15 añanan y e impacto di turismo como actividad principal di e isla, pa nos ripara cu e problema di maneho di desperdicio ta creciendo na un forma alarmante.

Tambe PAHO ta conseha cu mester bin cu estudionan tecnico cu tin e siguiente informacion: recopilacion y procesamento di resultadonan y informenan di estudionan anterior; elaboracion di diagnostico ambiental; elaboracion di e proyecto ehecutivo; analisis di e alternativanan di solucion; notificacion riba e ubicacion di e dump sanitario temporal; eliminacion di e fauna nocivo; compactacion y sealing di e desperdicionan solido.

Den e proyecto di saneacion ambiental mester realisa e siguiente accionnan: Defini un sistema di drenahe di awa; establece un sistema di control y maneho di olornan; establece un sistema di control y kimamento di gasnan; establece un programa di control di bestianan contagioso, incluyendo musca, sangura y djaca; establece un programa di control di candela; establece un control di cacho; establece un programa di monitor ambiental pa awa, tera y aire; defini  un sistema di control di dumpnan pa defini accionnan di rehabilitacion despues cu e wordo cera.

Teniendo na cuenta tur e puntonan ariba menciona, Dellanire Maduro tabatin e siguiente preguntanan pa Minister Marisol Lopez-Tromp: 

  1. Pa loke ta incinerator chikito 
  2. Tin un risk assessment haci? 
  3. A finalisa e SAT (Site Acceptance Test)? 
  4. Ki dia a inicia cu e testing? Con e testing ta wordo haci, mirando cu a bin pregunta di e procedencia di residuo cu wordo produci den e testing? 
  5. Ken lo maneha e incinerator? 
  6. Con lo maneha e residuo cu lo keda atras? 
  7.     A logra cu cooperacion di WEB saca un “thermal drone picture” recien pa identifica e areanan di temperatura halto di e landfill teniendo na cuenta cu e incinerator ta riba e mes    un tereno?
  8. Si por splica con e procesamento actual di sludge, residuo medico, bestia morto ta tuma luga, con e esaki lo cambia cu e incinerator?
  9. Si tin un comision di diferente departamento pa crea plannan pa maneho di desperdicio entre otro Plan di maneho solido di residuo hospitalario? 
  10. Si a establece un standard nacional y si esaki ta in place? Esaki mirando cu a pasa mas di 2 aña desde cu e rapport di PAHO a wordo traha.
  11. Documento di Serlimar “Candela weekend 20 februari 2020 landfill parkietenbos” ta informa cu tin 300-400 vehiculo pa dia ta bishita dump. Pa siman ta ricibi un average di 2000-3000 bishitante. 
  12. Cuanto di personan aki ta bishita regularmente? 
  13. Segregacion clandestino – hendenan cu no mester ta eyden, di cuanto hende nos ta papia ban bisa pa dia?
  14.   Cuanto habitante nan salud a wordo afecta directamente? 
  15. Si tin un estudio di e salud di habitantenan y di e empleadonan cu ta acudi dump regularmente/diaramente? 
  16. Cuanto ta gasto riba AZV debi na esaki? 
  17. Tin test di aire cu ta wordo realisa actualmente, si ta si, kico ta e resultado di e calidad di aire?
  18. Campaña di conscientisacion si ta enfocando riba esaki, por ehempel uzo di plastic di un solo uzo? 
  19. Centro di reduci, reusa y recicla (upcycle center) na e edificio di Serlimar, esaki ta tumando luga ainda?
  20. Si tin un PLAN integral?
  21. Kico ta stand van zaken di esaki y timeline? 
  22. Cua ta e posibel solucionnan a corto, medio y largo plaso?
  23. Ki tipo di cambio por verwacht di ley di Serlimar? 
  24. Ki fecha Parlamento por expect e cambionan cu minister a menciona cu ta tratando ribanan? 
  25. Si ta trahando riba otro leynan pendiente di afvalstofffen, mileu , calidad di aire entre otro?

Finalisando Dellanire Maduro a expresa cu a yega e momento pa tur hende mira den e mesun direccion y haya un solucion definitivo pa e problematica di dump/Parkietenbos.