Home » Bendemento di droga den Dakota trata den Corte

Bendemento di droga den Dakota trata den Corte

by Admin
0 comment 79 views

ORANJESTAD – Corte di Husticia a trata e caso penal cu Ministerio Publico a cuminsa contra e dama Arubiano R.R. y e homber Colombiano M.H.P. biba na Aruba. Aruba Native por a compronde cu ambos a wordo haya culpable di tabata bende droga den Dakota.

   Fiscal acusa R.R. cu entre 13 Maart 2010 y 13 Maart 2020 a bende marihuana y cocaina. Fiscal a e acusa M.H.P. cu entre 13 Maart 2018 y 13 Maart 2020 tabata bende marihuana y cocaina. Ta asina cu e pareha aki tabata casa pero a divorcia y cada ken ta riba su mes.

   R.R. a reacciona cu e no tabata bende droga pa 10 aña, manera Fiscal ta pretende. Segun R.R. ta 1 Maart 2020 el a cuminsa bende. M.H.P. tambe a bisa cu no ta corecto e periodo cu ta acus’e di a bende droga.

   BENDE DROGA: Hues a bisa cu e raport di investigacion ta mustra cu 9 Maart 2020, Polis a cuminsa observa dos cas den Pindastraat. Durante 4 dia a observa dos cas den Pindastraat. Ta hopi hende a bay na e casnan aki. A haci investigacion na e casnan. Ta asina cu Polis a mira cu R.R. tabatin cocaina den su man. Hues a mustra cu R.R. a declara na Polis, cu e ta bende droga pa mas di 10 aña y cu su yiu muher N. ta yud’e. El a bisa cu e ta bende 15 hende pa dia. Si e no tin droga, nan ta bay serca M.H.P. El a bisa cu nan tin 10 aña divorcia.
R.R. a bisa Hues cu esey no ta berdad. El a bisa cu su yiu muher no ta yud’e bende droga.

   Hues a mustra cu M.H.P. a declara na Polis, cu e no sa nada di bendemento di droga y cu e mes ta usa cocaina. El a bisa cu e ta bende cos dushi, refresco, cuminda, sigaria. Segun M.H.P., Polis a mira e productonan aki tambe. Hues a remarca cu ningun di e hendenan cu a bay na cas di M.H.P. a bisa cu a bay cumpra sigaria of otro producto. Segun M.H.P., Polis ta forza hende pa declara loke Polis kier, sino nan ta keda sera.

   FISCAL EXIGI CASTIGO: Fiscal a bisa Hues cu door di yamadanan, Polis a dicidi di haci investigacion. Polis a haci observacionnan y despues a drenta den e casnan. Ora a drenta cas di M.H.P., a mira M.H.P. tabata den baño y tabata haci manera pa flush droga. A haya placanan, casi 90 gram di cocaina a haya. A haya bukinan cu informacion. Fiscal a bisa cu e no ta kere cu M.H.P. tabata bende solamente cuminda na e cas. Na cas di M.H.P. a haya 1 sigaria so di marihuana. Na opinion di Fiscal, e ta haya proba cu durante 2 aña nan tabata bende. Fiscal a exigi pa R.R. 3 aña di prison di cual 1 aña ta condicional cu un tempo di prueba di 3 aña. Pa M.H.P., Fiscal a exigi 2 aña y 6 luna di prison di cual 10 luna ta condicional cu un tempo di prueba di 3 aña. Fiscal a bisa cu el a exigi abao pa M.H.P. pasobra tin indicacion cu pa 9 luna M.H.P. no tabata na Aruba. Fiscal a exigi tambe pa e droganan wordo destrui y e placanan y articulonan cu ta usa pa bende droga ta keda confisca.

   DECISION HUES: Hues a bisa cu e no ta haya legalmente proba cu M.H.P. tabata bende den e periodo menciona. El a tene na cuenta cu no a haya e cumpradornan cu droga. No a haya na e cas cantidadnan grandi di droga pa conclui cu ta bendemento. Pa loke ta R.R., Hues ta haya proba cu el a bende droga. Hues ta haya proba cu entre 13 Maart 2018 y 13 Maart 2020, R.R. a bende droga. Hues a mustra tambe cu M.H.R. a bisa cu mayoria di tempo e tabata den exterior y cu Hues ta tene cuenta esaki. Hues a bisa cu bendemento di droga ta pone salud di hende na peliger y ta fomenta criminalidad.

   Hues a condena M.H.P.  na 2 aña di prison di cual 1 aña ta condicional y 3 aña di prueba. Hues a condena R.R. na 2 aña y 6 luna di prison di cual 1 aña ta condicional y 3 aña di pruison. E droga lo wordo destrui, placa y otro articulonan lo keda confisca.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio