Gerencia di Tele Aruba a confirma na e Comision Nacional celebracion fiesta Patronal di Aruba Santisima Virgen Mama Maria di Alto Vista cu nan lo transmiti en bibo e misa solem di dia 7 di october na Kapel di Alto Vista mes, esaki ta cuminsa pa 5:30’or di atardi. En conexion cu e normal nobo cada parokia por ta presente cu 10 parokiano.
Fuera di ta e Fiesta mas grandi pa tur Catoliconan di nos pais, lo e ta un atardi di oracion Nacional pa pidi pa nos pais pa Nos Patrona Stima Mama Maria di Alto Vista, intercede pa nos den e momentonan dificil cu Aruba ta pasando aden. Tambe nos lo reza pa mundo henter.
Lo bay tin un ceremonia special dedica na tur esnan cu a muri pa motibo di e virus. Gobernantenan ta keda invita pa asisti sin falta.
CORECCION:
Parokianan ta ricibiendo den e dianan di nobena bishita di La Virgen Peregrino di Alto Vista. Por ser bisa cu cada parokia te cu awor a sali ricibi nos Mama Celestial stima den un forma hopi bunita y hopi fielnan a asisti y ta siguiendo e nobena den nan propio parokia.
Mañan 1 di october, luna di Santo Rosario y di flor, Mama Maria di Alto Vista Peregrino lo ta den Parokia di Tanki Leendert, e Nobena Nacional ta cuminsa pa 6’or di atardi. Por sigui’e via FB Parokia San Juan Pablo 11.
Dia 2 di october lo E ta den Parokia di Paradera, Nobena Nacional ta cuminsa pa 6’or di atardi y por sigui’e via FB Parokia Santa Filomena.
Dia 3 di october lo E ta di bishita na Parokia di Savaneta, Nobena Nacional ta cuminsa pa 6.30’or di atardi, por sintonise via FB Parokia Sagrado Corazon di Hesus.
Dia 4 di october lo e ta na Parokia di San Nicolas, Nobena ta cuminsa pa 9:30’or di mainta na Misa mes, tuma nota di esaki y por sintonise via FB Grot di Lourdes.
Dia 5 di october E ta na Santa Cruz, Nobena ta cuminsa pa 6:30’or di atardi y por sintonise via FB Parokia Inmaculada Concepcion.
Dia 6 di october E ta na Playa, Nobena ta cuminsa pa 6:30’or di atardi y por sigui esaki via FB Pro-Catedral San Francisco.
Dia 7 di october ta e fiesta grandi na honor di nos Patrona stima, Santisima Virgen di Alto Vista. Parokianan ta ser pidi pa hisa bandera e dia aki, tambe tur esnan cu ta stima nos Virgen stima pa hisa bandera na cas.
La Virgen di Alto Vista y Kapel di Alto Vista ta e sitio di oracion mas bishita pa nos hendenan y bishitantenan. Hopi milager a sosode durante siglo na e lugar bendiciona aki.
????????????????????????????????????