Home Politics Parlamentario Hendrik Tevreden (MEP): Casonan di Covid-19 cu tawata na 1600, awor...

Parlamentario Hendrik Tevreden (MEP): Casonan di Covid-19 cu tawata na 1600, awor a baha na 800 caba

SHARE

 

 

Nos no a yega ainda, pero nos ta riba e bon caminda pa bolbe domina e casonan di Covid-19. Asina a Minister President Wever-Croes a habri e reunion entre e crisis team y Parlamento di Aruba. Aruba ta bolbe marca adelanto den e casonan di Covid-19, danki na nos pueblo cu a mustra disciplina, y a duna oido na e metanan cu a wordo stipula pa e crisis team.

Awor nos tin di continua pa por yega na e ‘positivity rate’ cu nos kier logra. 

Aruba a perde 25 ciudadano den e pandemia aki di Covid-19. 15 di e casonan aki tawata den e ultimo simannan tras di lomba. Kiermen si nos no keda atento y wanta nos mes na tur e medidanan di hygiena y precuacion e situacion por bira alarmante hopi liher.

 

Hospital di Aruba 

E intencion ta pa e personanan den hospital mehora mas pronto posibel pa evita cu tur e camanan di cuido intensivo wordo yena cu otro casonan no relata na Covid-19. Te cu awor hospital tin suficiente capacidad den medium y intensive care pa atende tur ciudadano afecta pa Covid-19. Pero nos tin di cuida y sigui mantene e disciplina cu a bini ta mustra e ultimo siman aki. Solamente nos comportacion ta contribui na baha e casonan di Covid-19.

 

Turismo

Pa loke ta trata tursimo, e representante di ATA a splica na Parlamento cu ta premira 15.000 turista pa otro luna. Y cu tin un posibilidad pa recupera toch un cantidad mas grandi e lunanan nos dilanti. Tin di admiti cu apesar di Covid-19 tur parti di mundo, tursitanan toch ta scohe pa bini Aruba pa vacacion. Esaki ta basa ariba e confiansa grandi di parti turistanan pa nos isla. 

Pero tambe pasobra Aruba tin reglanan estricto prome cu turista por drenta, pa nos por proteha salud principalmente di tur esnan cu ta traha den e sector turistico, pa cuminsa.

Ta keda na nos tur pa sigui baha e casonan di transmision, pa nos por mira mas turismo y mira nos economia lanta cabes mas.

 

Cantidad di transmision

E cantidad di transmision a baha di 45% (piek), te na 25%. E intencion ta pa yega cu esaki na 5%, cu ta un averahe manehabel pa nos aparato medico. E crisis team ta sali for di e punto di bista ey, como cu no ta premira cu Covid-19 lo desparece por lo pronto. Pesey ta fiha cu pa termino largo si logra trece e cantidad di contagio di transmision na 5% lo ta mas responsabel.

E averahe di 5% ta un cantidad di mas o menos 30 caso pa dia. Kiermen pa logra esey comunidad tin di evita samenscholing, bisti mask, laba man djis pa menciona algun di e medidanan. E cantidad mas halto di casonan cu Aruba a registra tawata 178 caso ariba un dia cual pa nos capacidad medico ta un cantidad mucho halto. 

 

Gobierno a haci tur posibel pa amplia nos capacidad medico. A amplia ICU na 33 cama. A amplia cu mas profesionalnan specialisa cu ayudo di Hulanda. Y ta continua na haci test pa por verifica y asina por haya sa ken mas tin Covid-19.

E problema di mas grandi cu henter mundo tin cu Covid-19 ta e comportacion di e ser humano. Pesey laga nos como ciudadano haci nos esfuerso pa comporta nos mes respetando y aplicando tur e medidanan di Covid-19 cu Gobierno a indica. 

Laga nos keda enfoca cu nos meta principal ta pa baha e cantidad di contagio den nos comunidad.