Aprobacion di ley pa stimula E-Commerce
Diamars Parlamento di Aruba a aproba e concepto di ley “landsverordening langs electronische weg”. Dia pa dia actividadnan economico manera ta conoci ta tuma lugar na un manera electronico. E-commerce den e era digital ta bira mas importante y tin un impacto grandi riba e aspecto socio-economico di un pais. Transaccion electronico no ta encera solamente haci negoshi atraves di internet, pero tambe transaccion entre negoshinan (business to business), entre negoshinan cu su cliente (business to customer) y entre negoshi cu gobierno (business to administration).
Vision y maneho di Gabinete Evelyn Wever-Croes
Desde entrada na 2017 e vision y sigur maneho di gabinete Evelyn Wever-Croes ta dirigi pa stimula transparencia y acceso na mercado pero na mes momento fortifica e confiansa den transacionnan electronico door di kita obstaculonan huridico. Un ehempel den e ley aki ta cu esaki ta duna un base legal na firmanan electronico y documentonan electronico y sigur hasta por usa documentonan electronico como prueba. Mirando con liher tecnologia ta desaroya ta caracterisa e urgencia pa bin cu e ley aki. A escoge pa haci’e posibel cu atraves di un “landsbesluit houdende algemene maatregelen” por regla diferente topiconan. Pues haciendo esaki cada bes por hasi adaptacion necesario den bista di cu e mundo comercial y sigur e plataforma digital ta uno dinamico cu ta exigi cambia constantemente.
E concepto di ley
E diferente articulonan di e ley ta reglamenta comunicacion comercial cual ta encera entre otro e prijsnan di e producto y servicio. Tambe ta stipula kico e persona of negoshi cu ta ofrece un producto of servicio di e forma aki lo mester registra. Banda di e aspectonan aki tambe ta wordo reglamenta acuerdonan electronico, responsabilidad di esun cu ta ofrece un producto y of servicio, proteccion di datonan personal y “geheimhouding”.
E ley aki ta di vital importancia den reconstruccion di Aruba
Gabinete Wever-Croes a identifica 5 acelerador pa por sali fuerte for di crisis actual. Esakinan ta modernisa leynan laboral, elimina “red-tape”, reforme fiscal, e-government y amplia capacidad legislativo. E ley aki ta un aporte pa dos di e aceleradornan esta e-government y elimina red-tape, y di e forma aki e procesonan lo bira mas eficiente y sigur lo corta grandemente den e tempo cu tabata dura termina hopi proceso cu ta haci mas facil cu companian lo por establece y haci negoshi na Aruba.