Home » Prome Minister Evelyn Wever-Croes: UNDA NOS TA PARA AWOR?

Prome Minister Evelyn Wever-Croes: UNDA NOS TA PARA AWOR?

by Admin
0 comment 75 views

“Nos ta bringando un enemigo cruel y invisible. Pero e arma pa bring’e ta na alcanse di nos tur”

E cantidad di casonan activo pues a baha di e piek di 1600 caso activo pa 800 den dos siman.
E ‘positivity rate’ ta bahando, esaki ta e percentahe di casonan positivo compara cu e cantidad di testnan haci cada dia. Na comienso di e di dos brote, e ‘positivity rate’ tawata 40%. Comienso di e luna aki e tawata entre 30 y 35%, y awor e ta rond di 25%.

Prome Minister Evelyn Wever-Croes: “Esey kiermen cu awor, di e cantidad di testnan haci riba un dia, 25% ta positivo. Pues ta un bon noticia cu e % ta bahando, pero e no ta ainda caminda cu e mester ta. Eigenlijk nos mester yega na 5%, y p’esey mi ta awe akinan pa pidi henter comunidad pa nos sigui keda cu e disciplina pa baha e casonan. Nos disciplina a duna resultado e luna aki, pero nos mester sigui cu e disciplina pa algun siman mas te ora nos logra baha e ‘positivity rate’ mas.

Dicon? Pasobra e cantidad di personanan cu tawata tin Covid y a fayece ta 25, di cual 15 a fayece den e luna aki. Esaki ta preocupa mi hopi y ta duna mi hopi duele. Di akinan un biaha mas, mi ta desea famianan di esnan cu a perde un ser keri, hopi forsa cu nan perdida. Y mi kier urgi henter comunidad pa ban hunto percura pa no tin mas hende cu ta fayece. Cuida bo mes, cuida bo famia, y principalmente cuida esnan mas vunerable y esnan di edad halto. Pa asina evita cu abo haya bo den e dolor cu e 25 famianan aki a haya nan aden”.

Den e update cu Prome Minister a duna den Parlamento dialuna, el a indica cu e cantidad di persona den hospital pa dia, ta varia entre 35 y 45 den ultimo simannan. Di cual entre 9 pa 12 pa dia den Intensive Care.

“Mi ta desea tur esnan cu ta luchando cu Covid, especialmente esnan den hospital, un pronto recuperacion. Y cu pronto boso por ta bek na cas cerca famia. Mi por segura henter Aruba cu nos tin suficiente capacidad den hospital y den ICU pa atende cu tur e patientnan, pero e ta pone un presion grandi riba nos capacidad di cuido.
P’esey tambe mi ta pidi tur ciudadano di nos pais, pa un tempo mas, ban sigui demostra e disciplina cu nos mester demostra, pa combati e virus aki. Con?

Aki ta sigui algun puntonan di con nos por sigui demostra disciplina: Esakinan ta wordo ripiti constantemente pa asina cada ciudadadano keda demostra disciplina y guia otronan pa mantene disciplina pa hunto nos combati e virus.
Limita bo movecionnan mas tanto posibel,
Respeta e samenscholingsverbod, evita aglomeracion,
Aplica e reglanan di higiena, di laba man mas frecuente cu ta posibel of uza handsanitizers,
Tene distancia di otro, y uza bo tapaboca semper paden den establecimentonan y oficinanan,
Y si bo ta sinti malo, keda paden, yama bo dokter di cas y e lo guia bo.
Nos por combati e virus aki, door di aplica e reglanan aki. Riba nan mes, no ta cosnan dificil pa haci. Nos ta bringando un enemigo cruel y invisible. Pero e arma pa bring’e ta na alcanse di nos tur”, Prome Minister Evelyn Wever-Croes a enfatisa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio