Home Intimacy DS Love Coach: Pasion, Intimidad y Compromiso

DS Love Coach: Pasion, Intimidad y Compromiso

SHARE

 

Den un di mi articulonan anterior pa Arubanative mi a papia tocante e manera con un relacion ta cuminsa den forma di ‘passionate love’ y cu despues di algun tempo e pasion lo disminui y e amor den mayoria caso lo cambia di dimension. Esaki no ta nifica cu amor a caba. 

Hopi hende no por evita di distingui entre “stima” of “desea” of “aprecia” un otro persona, pero en realidad tin diferente forma di experiencia amor. Amor ta depende di e presencia y e nivel di tres componente principal.

Pa splica esaki, mi lo bai elabora ariba Robert Stenberg’s ‘Triangular Theory’. E idea tras di e theoria aki ta, cu amor ta consisti di 3 componente principal:

PASION – passion (motivacional)l: Pasion ta encera atraccion fisico y deseo sexual cu bo ta sinti pa un otro persona. Esaki ta locual ta distingui su mes di e amor cu nos ta sinti pa nos famia y amigonan.

INTIMIDAD – intimacy (emocional): Intimidad ta referi na e sentido di union y coneccion emocional cu nos tin cu un otro persona. Nota, cu intimidad den e sentido aki no ta referi na union fisico / sexual, sino mas bien union emocional.

COMPROMISO – commitment (cognitivo): Compromiso ta e decision consciente pa mantene un relacion pa largo duracion, den bon y den malo.

Sternberg ta di opinion, cu pasion ta build up rapidamente, yega na su peak y despues baha gradualmente den intensidad. Pa compensa esaki, intimidad y compromiso ta hunga un rol, y mientras cu esakinan ta presente, e relacion lo por sobrebibi. Si esaki no sosode, e relacion lo muri hopi lihe.

E ‘Triangular Theory’ ta sali for di e punto di bista, cu e (no-) existencia di pasion, intimidad y compromiso ta determina e tipo di amor cu ta existi entre dos persona (den un esfera no-familiar). Dependiendo di e existencia di cada un di e tres componentenan aki, nos por papia di 8 diferente tipo di amor. Un di e mihor cosnan di e theoria aki, ta cu e ta yuda nos compronde dicon tin tanto variedad den e manera con e ser humano ta experiencia y defini amor. Pa por compronde esaki miho, por wak e tabel akibou.

Sternberg’s Eight Varieties of Love

Type of Love                    Passion?     Intimacy?    Commitment?     Example

NonLove                           No               No                 No                          Acquaintances

Liking                                No                Yes                No                         Close friends

Infatuation                      Yes               No                 No                          Crushes

Empty Love                     No                No                 Yes                         Some arranged marriages

Fatuous Love                  Yes               No                 Yes                         Long-distance relationships

Romantic Love               Yes               Yes                 No                          Friends with benefits

Companionate Love      No               Yes                 Yes                         Long-term happy couples

Consummate Love        Yes               Yes                 Yes                         “Epic” romances

 

Den mi profesion di coach di relacion, mi sa topa hopi vez cu casonan di ‘Empty Love’. Ta trata aki di parehanan cu ta keda hunto solamente pa compromiso, por ehempel pa motibonan meramente religioso, economico, of pa no kibra e famia y destabiliza e jiunan. Den e casonan ey hopi vez tin infidelidad ta tuma lugar, caminda ambos ta escohe pa bira wak otro banda y ignora esaki. Tambe mi a topa varios relacion tipo ‘Companionate Love’ den cual e pareha ta menciona di ta sumamente feliz den nan rol di compañero, pero na mesun momento ta topa otronan, sea virtualmente of personalmente, pa por experiencia e chispa di pasion cu a bai perdi den nan relacion. 

Pues, locual sociedad a pone como ideal hopi vez ta leu di locual ta pasa den bida real.

Ta existi un relacion ideal? Segun Sternberg, e relacion romantico ideal ta esun conoci como “Consummate Love”, den cual pasion, intimidad y compromiso ta presente simultaneamente y ariba mesun nivel na tur momento. Esaki ta e amor cu nos tur ta desea di experiencia pa semper, pero cu ta sumamente dificil pa logra y mantene. Den tur relacion, e triangulo di pasion-intimidad-compromiso ta diferente. Un persona kizas ta mas comprometi cu e otro of mas apasiona cu e otro. Durante un relacion por tin fluctuacion y por bin cambionan permanente tambe den e preferencianan di cada un. E preferencianan aki semper lo keda hunga un rol pa locual ta trata e nivel di satisfaccion den e relacion. Mas similar e ‘match’ ta, mas satisfactorio e relacion, y mas grandi e chance di keda hunto ariba termino largo.

 

 

 

Desiree Swaen

Certified Life & Relationship Coach

www.ds-lovecoach.com