Avenida Nelson Oduber/Ex Sasaki: Diadomingo algo prome cu Toque de Queda a drenta na vigor, polis a wordo pidi cu urgencia pa un dama cu tabata tin un death wishi y tabata canando memey di caminda riba Sasaki. Esaki sigur tabata forma peliger no pa su so, pero tambe pa e automobilistanan cu den nan anfan pa yega cas na ora.
Mesora un patruya di Strandpolitie a cuminsa busca y poco prome cu e rotonde Fatum, nan a bin topa cu e dama enberdad ainda e tabata canando memey di caminda.
Mesora polis a acerk’e y a cuminsa papia tur na bon cu ne. E polisnan a pidi’e pa e baha for di riba caminda paso e ta formando un peliger pa su persona. E dama enbes di sigui orden di polis a cuminsa insulta polis den tur sentido di palabra y no kier a tende. E agentenan policial na dado momento a bisa ta basta y a bay atende cu ne na un otro forma. E dama a bira hopi raso y kier a bringa cu e agentenan policial. No a keda e agentenan nada otro cu detene e dama aki y pone plat na vloer.
E dama su pareha lo a yega na e sitio y a splica polis cu e dama ta sufri di depression y tabata bou influencia di alcohol. E la bay busca su pareha na trabou y bayendo direccion di cas, e dama a pidi su pareha pa e baha for di auto y e dama a cuminsa cana. Mesora e pareha a dicidi di yama polis pa asina evita lo peor. Polis a tuma tur dato di e pareha y despues a pidi pa presencia di transportwagen pa transporta e dama pa warda di Shaba caminda e lo haya un lugar pa e sosega y calma.
