ORANJESTAD – Corte di Husticia a trata e caso penal cu Ministerio Publico a cuminsa contra e homber Venezolano L.Pineiro Ocando y e homber Arubiano M.Tromp, kendenan ta wordo acusa di a prepara asesinato di un homber aki na Aruba. Aruba Native por a compronde cu nan caso penal a wordo trata via video conference. Ta asina cu L.Pineiro Ocando ta un sicario y ta encarcela na Bonaire pasobra a purba di mat’e den KIA manera Aruba Native a publica recientemente.
Fiscal a acusa e sicario L.Pineiro Ocando y M.Tromp cu riba 11 Januari 2020, nan a prepara pa asesina e homber K.R. y cu nan tabatin arma di candela. Fiscal a bisa cu M.Tromp tambe ta wordo acusa cu entre 11 y 13 Januari 2020, e tabatin 4 arma di candela entre otro un Uzi. Tambe cu riba 13 Januari 2020, e tabatin un cantidad di cocaina, pildernan di XTC y marihuana.
Durante tratamento di e caso, e sicario L.Pineiro Ocando a admiti di a wordo acerca pa mata K.R. pero cu su intension tabata pa haya e placa y despues baha na awa. E sospechoso M.Tromp a bisa cu e no tin nada di haci cu prepara asesinato y cu e armanan y droganan no ta di dje.
Fiscal a bisa Hues cu durante investigacion di un asalto arma, Polis a bin dal den combersacion di e sicario L.Pineiro Ocando cu ta bisa cu e lo haya 5 mil Euro pa mata e homber K.R. E lo haya un Uzi y un arma y un auto. E sicario lo a papia cu e cabezante di un organizacion poderoso den Caribe, kende ta bibando na Hulanda. E persona aki lo a duna e orden di asesinato na e sicario.
Fiscal a mustra cu Recherche a haya den e cellular di e sicario, mensahenan whatsapp cu M.Tromp, kende ta e intermediador. M.Tromp tabatin e armanan na un cas container na Madiki. Den e cas container, Arestatie Team a haci investigacion y a detene M.Tromp y a confisca un Uzi cu tres arma y un cantidad di droga.
Fiscal a bisa Hues cu Polis a bay papia cu K.R., kende ta sospecha di lo ta meti den droga y aparentemente lo a hit un cargamento di droga cu tabata destina pa Hulanda. Lo tabatin menazamento den un bar cu arma na Januari 2020 un tal R. y R. ta notifica M.Tromp. Despues K.R. ta haya menaza cu sicario tin su potret. Fiscal a sigui bisa cu despues ta haya combersacion di e cabezante di e organizacion poderoso cu e sicario L.Pineiro Ocando
Fiscal a splica cu a detene R. pa interogacion pero no tabatin suficiente prueba pa e keda encarcela.
Fiscal ta haya cu mester manda señal bon cla cu no ta accepta armanan di candela y tampoco droga. Fiscal a exigi 10 aña di prison pa M.Tromp.
Pa loke ta L.Pineiro Ocando, Fiscal no ta haya legalmente proba cu e tabatin armanan di candela hunto cun’e y pesey a pidi Hues pa declara L.Pineiro Ocando liber di e acusacion ey. Fiscal ta haya legalmente proba cu L.Pineiro Ocando ta envolvi den e preparacion pa mata e homber R.T. Fiscal a exigi 7 aña di prison pa L.Pineiro Ocando. Hues a bay studia e caso y otro luna lo tin sentencia.