Home Politics Lider di fraccion Marlon Sneek: Minister di Enseñansa ta un manipulado y...

Lider di fraccion Marlon Sneek: Minister di Enseñansa ta un manipulado y gañado

SHARE

Un gobierno cu constantemente ta papia di integridad, mester tin ministernan cu ta integro, ministernan cu ta sincero y habri cu pueblo pero na momento cu Ministernan di gabinete Wever Croes kier menosprecia inteligencia di pueblo, e mandatario y su gobierno nunca por ta integro.
Lider di fraccion di AVP, sr Marlon Sneek durante conferencia di prensa di su fraccion, a mustra cu Minister Rudy Lampe, kende for di algun tempo caba ta hibando un maneho sin pia ni cabes, kier sigui draai e berdad y bin cu insinuacion- y mentiranan cu mesora pueblo ta mira cu no tin sinceridad.
“Minister Lampe kende kier abusa di werksternan den servicio di SKOA, a bin dilanti y papia cu gobierno anterior a inverti den un proyecto di tram na luga di inverti den enseñansa.
Aki tin cu puntra si minister Lampe of otronan a mira cu e yobida reciente a pone cu caya grandi a yega cu awa, no a mira comerciantenan pusha awa pafo cu a drenta nan negoshi, esaki no a sosode ya cu ta un trabou integral a wordo haci eynan.
E tram ta un pida di tur loke a wordo haci den su totalidad y awe tin un sistema di riool cu ni dilanti di e eficion di Aruba Trading, caminda semper ta yena na momento cu yobe hopi, awa no ta para mas eynan y autonan por pasa sin problema. Ta un otr parti di un proecto integral cu gobierno di AVP a ehecuta pa garantisa pa drecha caya grandi.
Ora cu nos scucha Minister Lampe papia cu mester a inverti den scolnan rond Aruba y gobierno di AVP no a haci esaki, e minister aki ta mustra di mala fe, sigur ora cu practicamente den tur bario pueblo por a mira cuanto a wordo haci pa drecha scolnan.
Ta tristo pa señala cu Minister Lampe tin tur e informacionnan aki cu gobierno di AVP a inverti den enseñansa, ya cu ex Minister Hooijboer a traspasa tur informacion pa su persona y Lampe sigur tin e listanan di inversionnan cu gobierno di AVP a haci den scolnan rond Aruba.
Aki nos ta papiando di mas cu 60 miyon cu a wordo inverti den edificionan di scolnan di Aruba y pa refresca memoria di Lampe y su gobierno, por menciona Colegio San Nicolas cu inversion di 400 mil florin, Graaf van Zinzendorf Kleuterschool 195 mil, omheining Mons Plaisierschool 236 mil florin, Felipe B. Tromp na Noord 500 mil florin, Colegio San Antonio 6.6 miyon florin, Colegio San Augustin 3.1 miyon florin, Rosa College 4 miyon florin, Pius X School, Caiquetio tur a hinca placa den nan y asina e lista ta sigui.
Maria College 4.4 miyon florin, Scol Basico Washington, St Anna School 5.2 miyon florin, La Salle CollegeAbraham de Veer, Mon Plaisier Kleuter en Basisschool, 1.4 miyon florin, St Aloysiusschool 200 mil florin y asina por sigui con gabinete Mike Eman I y II a inverti den formacion y educacion di nos mucha- y hobennan.
A percura pa un pais prospero y a inverti den locual tabata enseñansa y no manera awe bou di Minister Lampe kende no por mustra pueblo un solo scol cu el a laga drecha y unico cos cu el a haci, ta trece panico, trece problema y desaster den enseñansa.
Esey ta tur loke Minister Lampe a percura pe den enseñansa ultimo tres aña, nada mas y pesey pa fraccion di AVP ta importante pa nos trece e puntonan aki dilanti pa pueblo.
Banda di esaki por mira presupuesto di enseñansa, caminda na 2009 ora cu partido AVP a asumi gobernacion di e pais, tabata un presupuesto di 195 miyon florin y ora cu AVP a Sali for di gobernacion na 2017, enseñansa tabatin e presupuesto di mas grandi di pais Aruba, un presupuesto di enseñansa cu a yega 280 miyon florin.
Pues 85 miyon florin mas a wordo inverti den enseñansa riba e periodo di 2009 pa 2017, pues ocho aña largo, debidamente enseñansa a haya su atencion pero atrobe pueblo por mira un Minister Lampe manipulado, ya cu riba tur cos cu e papia di enseñansa, e kier draai a asuntonan.
Por ehempel Lampe a papia di Imelda Kleuterschool bisando cu nan a haya otro edificio pa bay den dje y cu ta e scol a bisa no pero e berdad ta cu Minister Lampe kier a duna e scol un edificio na Burunbundu, mientras cu maneho di SKOA semper tabata pa muchanan di Oranjester keda den e region aki y evita cu mayornan tin cu bay te leu hiba nan yiu scol.
Pues ta mas cu claro cu Imelda Kleuterschool a gradici Minister Lampe y a informa mesor acu nan mes lo bay mira con nan lo drecha nan edificio den De La Sallestraat pa asina hinca e muchanan den nan edificio.
Aworaki e muchanan ta na cas hayando pakete di les pa asina nan tog sigui haya les mientras cu nan scol ta keda cla y aki tin cu mustra cu e edificion den De La Sallestraat, Minister Lampe kier a basha e edificio abou mescos cu el a haci cu e edificio di Frere Bonifacius cu te dia di awe ainda e no por duna nan un edificio nobo.
Esey ta e realidad di e situacion, un Minister Manipulado, kende simplemente no por papia berdad ya cu den su mente Lampe kier a manda Imelda Kleuterschool te Pos Chikito pa basha e edificio abou y ta mas cu claro cu e scol a bisa pa laga para y cu e scol mes lo busca un forma pa yega na fondo pa drecha e scol.
Esaki ta e minister di enseñansa cu Aruba tin, manipulado, gañado y sin nocion di loke e tin cu haci,” lider di fraccion di AVP, Marlon Sneek a declara.