Home » Pa yuda esnan den necesidad urgente: “ARUBA ONE HAPPY ISLAND LIONS CLUB TA ORGANISA DRIVE THRU DONATION DROP OFF”

Pa yuda esnan den necesidad urgente: “ARUBA ONE HAPPY ISLAND LIONS CLUB TA ORGANISA DRIVE THRU DONATION DROP OFF”

by Admin
0 comment 58 views

Comunidad por duna paña, cos di hunga y productonan higienico

ORANJESTAD – Diasabra awo 26 di september for di 1’or di merdia pa 4’or y mey di atardi, Aruba One Happy Island Lions Club ta organisa un “Drive Thru Donation Drop Off” den e caya di Rumbastraat panort di Plaza Libertador Betico Croes. E situacion ta haci cu den e tempo di crisis aki, mester ta creativo pero keda responsabel. Pa e motibo aki y cumpliendo cu e demanda di nos comunidad ta organisa e Drive Thru Donation Drop Off cu lo tumabo menos cu 5 minuut y cu e seguridad necesario. Nos organisacion ta sigui yuda nos comunidad den e periodo dificil aki.

Productonan cu por haci donacion:
Aruba One Happy Island Lions Club ta haci un yamada na comunidad di Aruba en general pa coopera door di haci donacion di e.o. paña pa baby, mucha, hoben y adulto, cos di hunga, laken pa cama, slopi, serbete, tur mester ta limpi, dobla y den bon estado den un bon saco of caha, pasobra esnan den necesidad merece donacion den bon condicion. Como tambe productonan higienico manera e.o. habon, shampoo, pasta di djente, skeiro di djente, handsanitizer, pampers, toilet paper y wipes, cualnan mester ta sera den nan empake of boter. Solamente e donacion- y productonan den bon condicion lo wordo ricibi y lo wordo entrega na famianan den necesidad urgente.

Benta di Tapaboca certifica:
Alabez e atardi aki lo tin disponibel pa wordo cumpra e Tapaboca cu bo por laba y por sigui wordo usa. Ta trata aki tapaboca cu certificacion internacional, 7 filtro y hopi comfortabel pa usa y respira. Esakinan ta ideal y confortabel pa usa den oficina, na scol, na cas y como tambe ora cu mester sali for di cas. E Tapaboca ta disponibel den sizenan S, M, L y XL. Stima y protega bo mes, cumpra un bon Tapaboca y asina bo ta yuda Aruba One Happy Island Lions Club tambe recauda fondo pa asina por sigui organisa e demanda di proyectonan na bienestar di esnan den nos comunidad cu ta den necesidad.

Drive Thru Drop Off:
E actividad aki ta estilo di drive thru. Miembro y boluntarionan cu tapaboca bisti lo ta riba acera den Rumbastraat, e caya panort di Plaza Libertador Betico Croes. Tur esnan cu ta desea di contribui ta yega cu nan auto staciona na banda y entrega nan donacion na miembronan y boluntarionan di Aruba One Happy Island Lions Club cu lo ta para na cada distancia den caya Rumbastraat. No mester baha for di auto, por pone e saco of caha den baul y ta staciona y un miembro y/o boluntario lo saca e donacion for di baul di e auto. Y despues di esaki por sigui, sin cu mester baha di auto. E trayecto aki lo tuma menos cu 5 minuut di bo tempo.Teniendo cuenta cu e pandemia di Covid-19, e salud di nos comunidad, miembro- y boluntarionan ta nos prioridad, pa e motibo aki Aruba One Happy Island Lions Club ta creativo y ta busca e miho forma pa organisa actividad cumpliendo cu e reglanan di departamento di salud publico pa un y tur ta protegi y ta keda sano.

Aruba Ban Yuda:
Un invitacion na comunidad pa ban yuda Aruba One Happy Island Lions Club yuda esnan den nos comunidad cu ta den necesidad. E siman aki waak den boso cashi caminda sigur tin pañanan den bon condicion cu ya no ta wordo usa y esaki lo por haya bon uso pa esnan den necesidad. Tur donacion ta yuda. Pa mas informacion por bishita e pagina di Facebook di Aruba One Happy Island Lions Club of email [email protected] .

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio