Home » Lider di fraccion Marlon Sneek: Futuro di 97 werkster ta den man di Minister Rudy Lampe

Lider di fraccion Marlon Sneek: Futuro di 97 werkster ta den man di Minister Rudy Lampe

by Admin
0 comment 71 views

Enseñansa ta sigui confronta problemanan cu e actual Minister di Enseñansa, esta Rudy Lampe caminda por constata cu tin hopi pero hopi problema mes den enseñansa, segun lider di fraccion di AVP, sr Marlon Sneek a trece dilanti.
E parlamentario a mustra cu mientras cu aña escolar a inicia sin cu cierto problemanan ocasiona pa e maneho di Minister Lampe a wordo soluciona, ultimo dianan por keda wak con e situacionnan aki ta sigui presenta na varios scol rond Aruba.
“Dialuna por a scucha Minister Lampe declara cu c’un persona tin cu wordo teni ‘accountable’ y aki nos tin cu bisa: ‘minister, si nos tene bo accountable, awe bo mes mester tene e honor na bo mes y baha bay.’
Ta imposibel cu nos ta haya un persona cu ta sinta cu full un korps di maestro, hunto cu nan sindicato, priminti nan algo, anto despues sali bisa cu no ta esey bo a bisa.
Bo ta cambia palabra Minister y e cosnan aki ta falta di integridad ya c’un hende cu ta gaña, no ta un hende integro, mas ainda ora cu nos tende e minister aki bisa cu SKOA debe 8.5 miyon florin y basa riba e debe aki di 8.5 miyon, e board di SKOA tin cu bay.
Ta bon pa tur hende sa cu e cobransa cu e minister aki kier manda pa SKOA, ta nada mas y nada menos cu e sociale lasten di trahadonan cu ta haci limpiesa na scolnan di SKOA.
Pues no ta placa cu uno SKOA a haya y hinca den su saco pero ta placa cu SKOA a haya pa paga su trahadonan, pues ora cu e minister bisa cu SKOA a tuma 8.5 miyon florin cu no tabata di dje, cu a wordo usa pa paga sociale lasten.
Pues e placa aki a keda den mesun caha di gobierno, ya cu el a bay pa paga AWW, el a bay pa paga AZV y belasting cu e trahadonan aki tin cu paga.
SKOA a actua basa riba un decision di un Ministeriele Beschikking caminda cu ta bisa cu na 2015, cu pa añanan largo e trahadonan aki a wordo mal trata y a bin cu e MB pa trek e asunto aki recht.
Ta cuminsa c’un ministeriele beschikking y den esaki tambe ta bisa cu e ‘Landsbesluit’ mester bin pero Minister Lampe a bin, cay sinta riba e stoel y no a haci su trabou, anto awe e kier papia di asunto cu ‘no e board di SKOA no a funciona manera mester ta, shonnan un board of fundacion ta traha basa locual cu e haya como subsidio.
Den e caso aki e subsidio a bin y nan a paga nan trahadonan, pues ningun momento so tabatin gastamento di placa, no tabatin hendenan cu a bay cu placa cu no ta di nan y esaki nos a trece dilanti caba y ta di lamenta pa scucha con Minister Lampe ta twist palabra di diferente ciudadano, den e caso aki esunnan di SKOA y bira bisa cu nan debe 8.5 miyon florin.
Loke tin cu pasa den henter e asunto aki, ta cu ‘abo minister’, mester bay traha bo Landsbesluit pa caba, ya cu gobernacion ta continuacion y cosnan cu ta dushi, cosnan cu ta bon, bo no ta bin bisa cu ta decision di gobierno di AVP y esaki sin duda ta un decision di gobierno di AVP.
Caba cu e trabou y traha e Landsbesluit y mustra mas respet pa e werksternan aki manera abo mes a bisa den un mocion. Un mocion cu a wordo entrega den Parlamento caminda den e mocion ta bisa e Minister, esta Lampe, pa urgi gobierno pa sondea tur posibilidad pa bin c’un solucion pa asina evita cu e werksternan ta bay perde nan trabou.
Loke Minister Lampe ta haciendo, ta hunga cu palabra bisando cu ningun werkster lo perde trabou pero loke ta bay pasa ta cu nan lo bay den e situacion miserabel cu nan tabata antes, caminda un werkster cu mester a percura pa un scol di 12 klas esakinan wordo teni limpi, mester cobra 450 pa 600 florin pa luna.
Esey loke Minister Lampe kier, caminda ya nos a yega di bisa na varios ocasion, cu Lampe ta un minister dictador, caminda e ta kere cu e ta bibando den un pais di dictadura, e ta kere cu e ta biba den un pais comunista, caminda e ta bay pone hende traha pa nan cobra 600 florin pa luna, cual ta mustra cu e ta un abusado.
Loke e tin cu haci ta traha e Landsbesluit y cumpli cu e 97 werksternan aki manera cu Parlamento a bise pa haci pero no, Minister Lampe kier sigui su mesun caminda,” lider di fraccion di AVP, Marlon Sneek a declara.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio