ORANJESTAD – Apesar cu Fiscal a exigi 6 aña di prison pa nan, Hues a condena e trio P.K.W., R.D.F. y I.S.R., na castigonan mas abao.
Aruba Native por a compronde cu Hues, via video conference, a bisa cu P.K.W. tabata esun cu a organiza e dos asaltonan y R.D.F. a haci’e. E dama I.S.R. ta wordo acusa di ta complice door di a yuda. Hues a mustra cu I.S.R. tabata na altura di e asaltonan. P.K.W. a planea tur cos y a cumpra e armanan. Hues ta haya cu I.S.R. a mustra cu e supermercado lo ta ideal y a busca e localisacion riba Google y manda pa R.D.F. y a mustra cu por cambia number di auto. Hues ta haya cu aki I.S.R. a yuda pero no ta haya cu el a haci e asalto arma. Pesey Hues no ta haya I.S.R. complice di e asalto. E asalto riba cas di e doño di e supermercado, I.S.R. tabata vigila y esey ta keda cualifica como complicidad.
Hues a mustra cu P.K.W. a cumpra pistolnan di aire y cu esakinan a haci e asaltonan. E victimanan tabata hopi spanta y tabata teme pa nan bida. Na e cas e yiu homber chikito a pasa e susto di su bida. E otro asaltante, cu a bay Venezuela caba, a hasta dal un di esnan den e cas.
Hues a tene cuenta cu e trio a duna claridad di e caso. Hues a condena P.K.W. y R.D.F. na 5 aña di prison, kitando e tempo cu nan ta sera den KIA.
Hues a condena I.S.R. na 30 luna di prison di cual 10 luna ta condicional cu un tempo di prueba di 2 aña. Parti di e damandanan lo keda aproba y Hues a pone e medida di pago. Esey ta nifica cu si nan no paga, lo haya castigo di prison.