Home Local Plataforma Hobennan Profesional (PHP) – Tienda di Ley: Periodo en conexion...

Plataforma Hobennan Profesional (PHP) – Tienda di Ley: Periodo en conexion cu duna aviso pa termina e relacion di trabou ‘opzegging’

SHARE

Un relacion di trabou no por wordo termina sin mas door di un dunado di trabou of e trahado. Buki 7A di nos Codigo Civil ta reglamenta e periodo cu un dunado di trabou mester tene na cuenta ora cu e lo kier avisa e trahado cu e kier pone fin na e acuerdo laboral. Den e edicion di e comunicado aki no los ta poniendo enfasis riba art. 7A:1615h y art. 7A:1615i.

Art.7A:1615h ta describi e scenarionan den cual un dunado di trabou ta prohibi pa termina e relacion di trabou cu e trahado. Segun inciso uno e dunado di trabou no por termina e acuerdo laboral di un trahado mientras cu esaki ta indispuesto (AO) pa labora door di un malesa. Si duracion di e malesa ta mas largo cu un aña e ora si esaki ta posibel. Nos kier pone enfasis cu e periodonan relaciona cu ‘zwangerschapsverlof’ of malesa durante e fase aki no ta wordo considera como un periodo cu e trahado tawatin un malesa.

Inciso dos di e mesun articulo aki ta menciona cu e dunado di trabou no por termina e acuerdo laboral durante e periodo di embaraso di e trahado. Locual e dunado di trabou si por haci ta exigi un declaracion di un medico pa asina confirma e embaraso di e trahado. Ta mas cu claro cu e dunado di trabou tampoco por deshaci di e servicionan di e trahado durante e periodo di bevallingsverlof, ni tampoco despues cu e trahado a reanuda su trabou, durante e 6 simannan siguiente mara na e bevallingsverlof of si acaso e trahado pa un of otro motibo ta incapacita pa realisa su trabou pa motibo di e parto of e embaraso. Inciso tres ta trece dilanti cu un dunado di trabou no por termina e acuerdo laboral pa e simpel hecho cu e trahado ta miembro di algun sindicato. Importante pa remarca ta cu e actividadnan mara na e asociacion aki no por tuma luga durante horario di trabou y mucho menos sin e permiso di e dunado di trabou. Segun e di cuater inciso e dunado di trabou no por termina e acuerdo laboral debi na e matrimonio di e trahado. Tampoco por termina e acuerdo laboral den caso di un transferencia laboral manera ta ser menciona den art. 7A:1615db. Inciso 6 ta menciona cu e dunado di trabou no por termina e contrato laboral si acaso e trahado nenga di duna su aprobacion pa traha riba un diadomingo, manera ta ser menciona den art. 1 di Arbeidsverordening. E situacion ta cambia na momento cu den e contrato laboral ta stipula cu e trahado tin cu mantene su mes na shift work.
Cada contrato laboral ta mara na un periodo di pre-aviso, es decir opzegtermijn. E no ta permiti pa bandona pia di trabou sin previo aviso. Di e manera aki ta evita cu e dunado di trabou ta haya su mes confronta cu un trahado menos all of a sudden. E periodo di pre-aviso ta juist pa duna e dunado di trabou e oportunidad di adapta su mes na e renuncia di e trahado. Di otro banda, e dunado di trabou tambe tin cu cumpli cu e periodo di pre-aviso y no por kita e trahado for di trabou per direct. Esaki ta pa evita cu e trahado haya su mes confronta cu problema financiero diripiente mirando cu e ta kedando sin entrada. Naturalmente tin un excepcion riba e regla di pre-aviso. No mester cumpli cu e periodo di pre-aviso den caso di ontslag op staande voet. Ta importante pa remarca cu den caso di ontslag op staande voet mester tin sprake di un dringende reden. Tambe no mester cumpli cu e periodo di pre-aviso si e trahado ainda ta den periodo di prueba.
Art.7A:1615i ta trata e tema di e periodo di pre-aviso. Inciso uno di e articulo aki ta menciona cu e terminacion ta tuma luga na final di luna, al menos cu esaki a wordo palabra di otro manera den un contrato por escrito of si acaso esaki ta e custumber.
Inciso dos di e mesun articulo aki ta menciona cu e dunado di trabou tin cu tene cuenta cu e periodo di pre-aviso di e siguiente manera:
Si acaso e contrato laboral a dura menos cu 5 aña, e dunado di trabou tin cu cumpli cu un periodo di 1 luna di pre-aviso;
Si acaso e contrato laboral a dura 5 aña of mas, pero menos cu 10 aña, e dunado di trabou tin cu cumpli cu un periodo di 2 luna di pre-aviso;
Si acaso e contrato laboral a dura 10 aña of mas, pero menos cu 15 aña, e dunado di trabou tin cu cumpli cu un periodo di 3 luna di pre-aviso;
Si acaso e contrato laboral a dura 15 aña of mas, e dunado di trabou tin cu cumpli cu un periodo di 4 luna di pre-aviso.
Di otro banda e trahado tambe tin cu cumpli cu e periodo di pre-aviso, den caso cu e tin pensa di termina su contrato laboral. E periodo di pre-aviso cu e trahado tin cu cumpli cune ta mara na 1 luna segun inciso tres di e mesun articulo aki.
Tambe por desvia por escrito di e regla menciona den inciso tres. Den caso di un trahado e periodo di pre-aviso no por ta mas largo cu 6 luna. Y si ta trata di e dunado di trabou, e periodo di pre-aviso no por ta inferior na e double di e periodo di e trahado.
Tienda di Ley a wordo forma door di un grupo di studiantenan di ley y tambe huristanan cu pa dos aña caba ta brindando asistencia huridico na nos comunidad di Aruba. Durante e existencia di Tienda di Ley nos a publica diferente articulonan huridico. Nos a trata diferente topiconan di nos Codigo Civil, Ley Constitucional, pero tambe Codigo Penal, Ley Administrativo y Ley di Labor. Nos meta no ta pa solamente brinda asistencia huridico na nos comunidad, sino tambe informa nos pueblo y comunidad di nan derechonan. Cada ciudadano di Reino Hulandes ta suppose di conoce e leynan, pero hopi biaha pa falta di transparencia esaki no ta sosode. E hecho cu nos leynan mayoria biaha ta dificil pa compronde tambe ta hunga un rol. Pa e motibo aki nos ta purba di hinca e articulonan mas simpel cu nos por den otro na Papiamento, pero no tur biaha tin palabranan huridico exacto cu por wordo uza.
Ta spera cu por a informa e lector un poco tocante e topico aki. Si bo persona tin pregunta of ta desea asistencia huridico por tuma contacto cu nos via nos facebook page of nos e-mail: plataformahobennanprofesional@gmail.com.

Scirbi pa studiantenan di ley:
Minorca Martis LL.B
Gerick Croes LL.B, B.Ec