Un di e condicionnan mara na e di dos fiansa door di Hulanda tabata cu Aruba mester corta 5 miyon Florin pa luna, cada luna, te cu December di e aña aki. En total 35 MIYON FLORIN!
Esaki memey di un pandemia y mientras cu na Hulanda mes nan punto di salida ta cu no lo corta den salubridad publico.
Un suma cu a bin cay for di cielo y sigur no ta basa riba ningun clase di calculacion obhetivo, investigacion of consulta cu AZV. Pio ainda ta e hecho cu no a ni tuma e decencia pa analisa kico lo ta su consecuencia riba nos cuido medico.
Corta den AZV
Ya cu staatssecretaris Knops ta bezig ta presenta calculacion mustrando su preocupacion pa loke ta trata Aruba, dus ban laga nos sigui su ehempel. E condicion di Hulanda pa loke ta trata AZV ta significa cu mester corta 166.000 florin pa dia den AZV. Esaki sigur lo tin su impacto riba e calidad di cuido na nos pueblo y mas cu claro lo trece gasto adicional pa e cartera di e clase trahador cu ta pasando ya caba den momentonan sumamente dificil. Pasobra si AZV no ta paga mas pa cierto gastonan di remedi, tratamento, biahe etc. ta ken mester pag’e? Un ta pueblo mes mester bay sak’e di su saco? Saco cu nos tur sa ya conoce su retonan diario pa por percura pa e cosnan basico di bida.
Si mester bin cambionan den AZV mes, awor sigur no ta e momento!
Si preocupacion di staatssecretaris, pa cu e situacion di nos pais y di nos hendenan, tabata genuino, Hulanda lo mester a duna Aruba masha aña caba un renteloze lening (0%) pa nos por a refinancia nos debenan. Na 2018 y 2019 Aruba a pidi pa esaki pero lastimamente Hulanda no a honra nos peticion. Aparentemente na e momento ey no tabata importante of relevante pa sr. Knops cu Aruba mester a paga 220 miyon florin na interes na 2018 y 232 miyon florin na 2019. Un total di 452 miyon florin na interes den 2 aña.
Kizas staatssecretaris Knops a lubida cu 452 miyon florin aki na interes, pa paga debe di Gobierno anterior, a wordo aproba door di e Gobierno di sr. Knops mes. A caso esaki no a hisa nos debe? Sr. Knops e tempo ey no a pensa cuanto nan por a yuda Aruba cu un prestamo na mihor interes? Sr. Knops no a tene cuenta cu Aruba su debe nacional e tempo ey? Sr. Knops no a realisa cuanto e debe tabata pisa riba lomba di pueblo di Aruba? Pesey mes mi ta di acuerdo cu minister Dangui Oduber cu a indica cu a bira ora pa sr. Knops stop di midi cu 2 midi!