A reuni cu Monumentenbureau, Monumentenfonds y Monumentenraad riba e trabounan di conservacion
ORANJESTAD – Ya pa varios aña e luna di september ta dedica na e monumentonan di nos Pais. Aruba ta conta cu varios edificio y obheto cu ta monumento cu ta wordo conserva como parti di nos herencia cultural. Den cuadro di e luna di monumento Minister Maduro di cultura a reuni cu tur e instancianan cu ta traha riba conservacion di nos monumentonan.
Tin 3 instancia encarga cu monumento
E cuido di monumento na Aruba ta den man di tres instancia, Monumentenbureau, Monumentenfonds y Monumentenraad. Monumentenbureau ta e Departamento di Gobierno cu ta encarga cu tur asuntonan general di monumento, manera maneho, permiso, proteccion, restauracion y tur asuntonan tecnico di monumento. Stichting MonumentenFonds Aruba (SMFA) ta encarga cu restauracion, mantencion y huur di e edificionan monumental di Aruba y alabes ta aporta na conscientisacion tocante e balor di monumentonan di Aruba. Monumentenraad ta duna conseho na Minister di Cultura tocante proteccion di monumento y permiso despues cu Monumentenbureau controla e peticionnan.
Minister Maduro a haya un bista riba e trabounan
Recientemente Minister Maduro a reuni cu e tres instancianan aki pa asina haya un bista riba e trabounan cu ta wordo haci pa conserva nos monumentonan na Aruba. Mester bisa cu aunke COVID19 ta trece retonan pa e trabounan, asina mes proyectonan di restauracion y mantencion ta sigui na Corte di Husticia, Maria Convent, Botica Aruba, Museo Arkeologico, Weststraat y Lighthouse. Recientemente a pone un ‘traplift’ tambe na Edificio di Stadshuis pa asina e monumento importante aki por ta mas accesibel.
Un areglo di subsidio y proteccion pa casnan di cunuco
Un preocupacion cu Monumentenraad a trece dilanti ta e hecho cu Aruba ainda no ta conta cu un areglo di subsidio pa asina por brinda un yudansa financiero na doñonan di edificionan priva cu tin balor monumental. Pa e motibo aki ta wak cu hopi edificio, entre nan, casnan di cunuco, ta bay perdi. E speransa ta cu pronto Monumentenfonds por logra establece un revolving fund cu lo por yuda cu e meta aki pa por yega na conserva tambe e monumentonan priva.
Bayendo pa 25 aña di conservacion di monumento
Otro aña ta marca 25 aña di e trabou cu e tres instancianan ta haci pa conserva monumento na Aruba. Pa conmemora e fecha special aki, Monumentenbureau y Monumentenfonds lo ta preparando nan programa pa asina conscientisa riba e importancia di conservacion di monumento. Minister Xiomara Maduro ta gradici tur tres instancia pa nan esfuerso pa mantene y conserva nos monumentonan como parti di e herencia cultural di Aruba.
