Un paso importante pa elemina red tape
ORANJESTAD – Diabierna Minister Maduro tabata na Departamento Economico pa presencia e lansamento oficial di e ‘e-forms’ cu ta haci e proceso di peticion di permiso pa negoshi uno full digital. Haciendo uso di inovacion den tecnologia Departamento Economico ta dal un paso grandi den elemina red tape pa asina por sigura cu e proceso pa lanta un negoshi na Aruba por bay na un forma mas acelera.
Via www.deaci.aw por yena e ‘e-form’ y keda cla
Awor comercio no ta limita mas pa warda pa un cita na Departamento Economico pa asina inicia e proceso pa peticion pa permiso di negoshi. Tur peticion por wordo haci online via www.deaci.aw. Sigui e instruccionan riba e website, scohe e tipo di permiso, scan e documentacion necesario, scoge e proposito di e negoshi (si ta aplicabel), yena ‘e-form’ y keda cla.
E-forms ta yuda elemina red tape
Cu e proyecto aki di peticion di permiso den forma digitalisa haciendo uso di ‘e-forms,’ Departamento Economico ta dal un stap grandi pa yuda elemina e tardansa cu red tape ta trece cune. E personal di Departamento Economico a ricibi un training tambe riba e proceso digital di e peticionnan pa asina por sigura cu e permisonan por sali mas liher y comercio por keda cla mas liher pa cuminsa of sigui cu nan negoshi.
Un proyecto na bienestar di comercio na Aruba
Minister Xiomara Maduro ta gradici Departamento Economico y ITP Caribbean cu a yuda haci e proyecto aki posibel. Un palabra di gradicimento ta bay tambe na Futura cu a yuda financia e proyecto importante aki cu ta un di e aceleradornan menciona den e ‘Masterplan Reposicionando e rumbo di nos Pais’ pa facilita comercio na nos Pais. Masha danki pa e bon cooperacion na bienestar di comercio di Aruba.