ORANJESTAD – Apenas e tabatin 4 dia sera den KIA, cu Ministerio Publico mester a saca e sicario Venezolano L.Pineiro Ocando for di KIA y mand’e prison na Bonaire. Esaki pasobra den KIA a purba di mat’e.
Aruba Native por a compronde cu na Januari 2020, e Venezolano L.Pineiro Ocando hunto e Arubiano M.Tromp a wordo deteni relaciona cu un caso di intento di asesinato. Polis, cu tabata investigando un caso di asalto arma, tabata scucha combersacionnan di e sospechoso L.Pineiro Ocando, como sospechoso di e asalto. A bin scucha con tabata haciendo preparacion pa mata e homber R.
A scucha con M.Tromp tabata bisa L.Pineiro Ocando cu tin un trabao p’e. E trabao ta encera pa asesina e homber R. Polis a scucha con L.Pineiro Ocando tabata papia cu un organizacion masha poderoso den Caribe y cu M.T. lo tin e armanan.
Di inmediato Polis a detene L.Pineiro Ocando y despues a haci un razia na cas di M.Tromp caminda a bin haya un Uzi y 3 arma.
Parce cu L.Pineiro Ocando, kende a wordo acerca pa e organizacion pa mata e homber R., lo a basha abao. Esey ta motibo cu e organizacion a manda mensahe den KIA pa mata L.Pineiro Ocando. Parce cu durante interogacion di Recherche, L.Pineiro Ocando lo a menciona nomber di e cabezante di e organizacion poderoso aki.
Por a compronde cu e sicario L.Pineiro Ocando, lo a wordo aserca pa e organizacion pa mata e homber R. aki na Aruba kende lo ta envolvi den hortamento di droga y tambe a menaza un persona cu arma den un bar.