Home Local Gobierno di Aruba: HULANDA A CAMBIA DI OPINION Y TA DISPUESTO...

Gobierno di Aruba: HULANDA A CAMBIA DI OPINION Y TA DISPUESTO PA PRESTA ARUBA ATROBE

SHARE

Den un conferencia di prensa Secretario di Estado Hulandes Raymond Knops a splica dicon Hulanda a cambia e condicionnan den e ‘voorwaarden brief’. Aki ta referi especificamente na e parti den cual ta referi na e ‘specifieke voorwaarden Aruba’, den cual na juli tabata tin inclui un suma di AWG 204 miyon pa lunanan juli augustus y september, y den e carta di november, a cambia esaki pa AWG 204 miyon pa lunanan juli, augustus, September, oktober y november.

Sr. Knops a splica cu como cu Aruba mes a logra cubri su gastonan pa e lunanan di juli y augustus, Hulanda no tabata sa cu Aruba tabata tin mester di mas placa. Y ta p’esey nan a baha e cantidad di placa. Pero awor cu nan a compronde cu Aruba tin mester di e placa aki, nan ta dispuesto pa presta Aruba e placa aki.

Gobierno di Aruba a reacciona satisfecho cu Hulanda a recapacita y ta dispuesto pa presta e suma cu Aruba realmente mester tambe pa cubri e debenan di juli y augustus.
Gobierno di Aruba a haci e peticion na Hulanda pa e suma adicional desde siman pasa, pero no a haya contesta ainda.
Gobierno ta lamenta cu Hulanda no a delibera cu Aruba riba esaki prome cu a cambia e condicionnan dia 4 di september, pasobra nos por a spaar hopi tempo, trabou y preocupacion. Sinembargo, Gobierno di Aruba ta satisfecho cu Hulanda a cambia di opinion.

Mientras tanto Gobierno di Aruba a wordo forsa desde dos siman pasa pa busca un solucion pa e problema aki, y manera Prome Minister Evelyn Wever-Croes a anuncia siman pasa, tin interesado pa presta Aruba e placa aki. Gobierno di Aruba a sigui cu e procedura y mientras tanto a emeti bono pa por haya placa riba termino corto, mirando cu e procedura cu Hulanda ta tardando demasiado. Awor pues Aruba ta wardando riba Hulanda pa aproba e suma adicional pa juli y augustus. Manera menciona, Gobierno di Aruba siman pasa mesora a manda e peticion pa Hulanda, pero ainda no a tende nada. Den e situacion aki, ta un bendicion cu tin otro interesadonan, pa financia Aruba. E interes ta mas halto, pero por lo menos e ta placa sigur riba termino corto. Y ta awor Gobierno di Aruba tin mester di e placa, cu urgencia, pa cubri especialmente cuido di salud, mirando cu Hulanda no kier financia full e suma.

Gobierno di Aruba kier enfatisa cu e ta actuando den e miho interes di cada ciudadano di nos pais.