E siman aki Aruba Tourism Authority (ATA) a lansa nan proyecto ‘One Happy Workation’. E programa aki ta invita tur persona cu un paspoort valido Mericano pa keda na Aruba pa 90 dia. E proyecto aki ta facilita Mericanonan cu un estadia di largo duracion sin cu mester pasa den e proceso di visa.
E pandemia a ocasiona cu hopi persona ta trahando for di cas, esaki ta berdad pa Mericanonan tambe cu tin nan ‘home office’ pa haci nan tareanan laboral. Zoom meetings a bira e manera pa reuni y plania trabou.
Mirando cu trabounan awor por wordo haci di un manera virtual for di cualkier parti mundo. Mericanonan tin e oportunidad di bin Aruba y disfruta di locual nos tin pa ofrece mientras nan ta gana nan pan.
Prensa international ta duna indicacion di ta impresiona cu e oportunidad cu Aruba a duna profesionalnan pa cambia di escena pa algun siman. Claro, mester nota cu e biaheronan aki tambe lo tin cu sigui e mesun procedura di salubridad contra COVID-19.