Awe durante un conferencia ministerial extraordinario, e 22 paisan miembro di e Association of Overseas Countries and Territories of the EU, OCTA, unanimamente a eligi Aruba pa e posicion di Presidente di su Executive Committee (ExCo).
E relacion di Aruba cu Europa como un OCT- Overseas Country and Territory a resulta caba den mas di € 40 miyon na grants pa diferente proyectonan cortesia di e European Development Fund. Adicionalmente, Aruba ta de facto e OCT cu ta hasiendo mas uso di entre otro e programa horizontal; Erasmus+.
Conscientisacion di e diferente oportunidadnan pa e OCTs por yega na “EU’s funding instruments” ta un di e prioridadnan di ExCo.
ExCo a facilita por ehempel pa otro siman diferente stakeholders na Aruba por participa na un webinar di e programa “LIFE” – cu ta e plataforma principal di EU pa proyectonan cu ta regarda “environment, energy and climate change”.
Dus dia 22 di september proximo Parke Nacional Arikok, Impact Blue Foundation y Metabolic Foundation na Aruba lo ricibi informacion valioso manera ki tipo di proyectonan specifico lo por yega na “financiamento” (grants) di parti di EU. Europe House Aruba lo ta encarga cu e deseminación di e informacion aki na Aruba.
Recientemente ExCo a dirigi tambe un peticion oficial na Comision Europeo pa aproba e annual work plan di OCTA – cu ta inclui un “Study on Blue Economy”. Esaki lo ta un estudio profesional (di € 60,000) y cu lo yuda OCTA traha un Roadmap pa implementacion den e OCTs. E estudio aki lo por facilita tambe transicion pa un “more integrated ocean-based economy”.
Awe mas cu nunca y sigur den e temponan nos dilanti cu hopi desafio, ta importante pa Aruba reforsa y renoba e cooperacion cu e otro OCTs y cu Union Europeo.
Y asina cu e condicionnan relaciona cu C-19 permiti esaki, ExCo lo tene un presentacion, den Parlamento Europeo mes, pa enfatisa tambe e consequencianan serio di e C-19 crisis pa cu e OCTs.
Asina aki tambe ExCo ta duna realse na e plataforma nobo – “Friends of OCTs” (miembronan di Parlamento Europeo) kendenan lo yuda OCTA eleva tambe e importancia di OCTs pa Europa.