Home Politics Parlamentario Robert Candelaria: Aruba mester di su lidernan schouder cu schouder

Parlamentario Robert Candelaria: Aruba mester di su lidernan schouder cu schouder

SHARE

 

 

Pais Aruba mescos cu hopi otro pais rond mundo na e momentonan aki, ta  bibando momentonan sumamente delicado caminda cu finansas publico, servicio di salubridad, husticia y enseñansa, ta confrontando cosnan nunca bisto pa hopi tempo. 

Parlamentario Robert Candelaria durante conferencia di prensa di partido AVP a mustra entre otro cu den henter e desaroyo dificil aki, ta bin noticianan for di mandatarionan Hulandes cu ta crea ainda mas incomodidad y insiguransa den pueblo.

“Entre otro por a scucha Prome Minister Rutte y Secretario di Estado Knops a bisa na mas c’un ocasion,  cu gobierno Hulandes ta papiando cu gobierno di Aruba pero  a insisti cu nan no ta negocia cu Aruba, cu otro palabra cu  na mes momento nan ta bisa cu sinta na mesa cu bo, no ta mescos cu negosha cu bo. Esaki ta enfatisa cu loke Prome Minister y Minister di Finansa ta bisa pueblo riba e desaroyonan aki, y loke gobernantenan Hulandes ta papiando no ta mes cos. Nan ta papia banda di otro. 

Banda di e discrepancia den negosacion cu Hualnda nos por mira por ehempel cu den husticia tin preocupacion cu un cantidad enorme di polis cu ta malo, sin cu gobierno tin un bista di loke tin cu wordo haci y con ta bay atende cu esaki. 

Den salubridad nos ta mira cu cantidad di casonan activo di corona ayera tabata na 1566 y ta sigui aumenta ya cu tin mas test ta wordo haci pero aki tampoco tin mucho claridad den kico gobierno mes kier haci pa atende cu esaki.

Den enseñansa scolnan a cuminsa manera cu gobierno a anuncia pero ya caba tin klasnan di varios scol cu mester cera, pa motibo di presencia di corona y den tipo di casonan asina, pueblo tin mester di un gobierno cu ta stimula cooperacion y no division. 

Mientras tur e desaroyonan aki ta tumando luga no tin indicacion concreto di gobierno con pa maneha esakinan.  

 

Mester remarca cu den e temporada difisil aki,  riba puntonan specifico, ta fasil pa busca  punto pa acusa contrincante politico cu lo no ta haciendo lo corecto. Pero ora hasi esaki,  kico gobierno kier logra cu e tipo di reaccion aki y con esey ta yuda e pueblo? 

Ta necesario y sigur un deber di fraccion di AVP na tur momento, pa caminda mester por trece mehoracion, nos no por keda sin trece e puntonan aki dilanti pero mester hasi esaki di un forma constructivo. Y esaki no ta solamente pa fraccion di AVP pero tur otro instancia y gremio cu ta stima e pais aki  cu kier mira algun cambio, algun mehoracion tin cu avisa esaki. 

Awor no ta ora pa acusa otronan y tira lodo riba otro pa purba score riba otro. 

Aruba mester di su miho hendenan, para schouder cu schouder pa sali como un front pa Aruba y den un proceso asina no mag dividi y busca forma pa  conkista. Cu kico esey lo yuda nos pueblo?

Algun ta kere cu nan lo gana cu e tipo di mentalidad politico aki pero a lo largo ta pueblo di Aruba lo perde y nos no por permiti pa esey pasa. 

Mester busca dialogo, mester busca consensus riba tur tereno crucial y esaki ta importante ya cu nos mester yega na un bon understanding cu Hulanda, loke lo ta na beneficio di nos tur y sigur Aruba prome!

Sin duda fraccion di AVP ta haya cu ta corecto cu gobierno no a acepta e condicionan manera nan ta stipula dor di Hulanda, ya cu mester yega na condicion cu ta bon pa control financiero  sano, cu ta bon pa reforma den gobierno pero otro condicionnan cu ta concerni pais y cu mester keda den man di pais, no por cambia.

Bou di e situacion actual ta na su luga pa nos pone diferencianan un banda, laga nos Sali pa dilanti manera un selecion nacional, uni cu otro pa salba e pais y ora cu logra esaki, despues por sigui bringa politicamente,” Parlamentario Robert Candelaria a declara.