Home Local Plataforma Hobennan Profesional (PHP) – Tienda di Ley: Eliminacion unilateral di...

Plataforma Hobennan Profesional (PHP) – Tienda di Ley: Eliminacion unilateral di bonus di fin di aña & savings pa vacacion

SHARE

E pandemia su efecto tawata uno devastador pa comercio en general y trahadonan. Specialmente e sector hotelero y su trahadonan ta un di esnan cu kisas mas hopi lo wordo afecta door cu e porcentahe di ocupacion di hotelnan ta na lo minimo. Algun hotel a dicidi di start nan operacion poco poco y simultaneamente ta purba na mishi na beneficionan di trahadonan. E intencion di algun dunado di trabou a bira conoci ora cu trahadonan ta haya carta informando nan cu e bonus di fin di aña y fondonan di spaar NO lo wordo haya door di nan. Esaki ta corecto? E pregunta aki nos lo trata na contesta den e edicion di e articulo aki for di e perspectiva di nos leynan laboral.

Na prome luga nos kier enfatisa cu cualkier carta dirigi na un trahado cu ta consisti di un decision tuma door di dunado di trabou sin cu e la consulta e trahado por wordo considera un decision unilateral. Den transcurso di e lunanan aki tin diferente ehempel cu por wordo nombra. Como ehempel nos ta menciona un carta di e dunado di trabou indicando 1) reduccion di oranan di trabou, 2) reduccion di salario, 3) reduccion di placa di vakantie. Awor cu december ta asercando dunadonan di trabou ta manda un carta cu lo corta e bonus di fin di aña y saving funds. Esaki tambe por wordo considera un decision unilateral.

Segun nos leynan e NO ta posibel pa duna e dunado di trabou e competencia pa haci cambio unilateralmente na e acuerdo laboral pa medio di un clausula. Art. 7A:1613h ta indica cu un clausula asina ta nulo esta cu no ta valido. Kiermen maske cu e dunado di trabou a pone den e acuerdo esaki no tin efecto pa ley. E segundo inciso ta indica cu un clausula cu ta permiti e dunado di trabou cambia e ambito laboral tampoco ta valido.

Den sentencia cu nos a presenta algun luna atras nos a enfatisa cu ta tene consideracion cu e situacion cu e dunado di trabou ta cai den un situacion imprevisto cu a afecta e negoshi negativamente. Segun corte esaki ta trece cune un interes di peso cual ta spera di parti di e trahado cu por conta cu e comprension pa cu e situacion pa entre otro por suspende cierto derechonan salarial.

Loke ta sumamente importante pa menciona ta cu Corte di Casacion a determina cu un decision unilateral no por tuma luga sin mas. E pregunta legal cu ta relevante den e caso aki ta: si di parti di e trahado por wordo spera cu e lo acepta cierto cambio den su acuerdo laboral? E cambio aki ta por ehempel eliminacion unilateral di bonus di fin di aña y saving funds. Segun hurisprudencia tin tres pregunta cu mester wordo haci pa determina esaki:
1) por papia di circumstancianan cu a cambia cu ta urgi na un cambio den e acuerdo laboral?
2) por papia di un proposicion rasonabel teniendo na cuenta e circumstancianan?
3) por spera di parti di e trahado cu ta rasonabel pa e acepta e proposicion?

Basa riba e criteria aki tin diferente scenario posibel. E prome pregunta lo por wordo contesta cu si, debi cu ta papiando di un pandemia cu a afecta comercio por completo. Hotelnan a bira victima di esaki cu un ocupacion % hopi abou. Si e proposicion ta rasonabel ta depende di e condicionnan. Por ehempel e ta haci un diferencia si acaso solamente mita di e bonus ta wordo corta den comparacion cu e bonus den su totalidad. Considerando e hecho cu sector publico a corta un porcentahe di nan uitkering y otro dunadonan di trabou a corta mita, den nos parecer e proposicion pa corta esaki den su totalidad NO ta rasonabel.

E di tres pregunta ta pone e expectativa di e trahado central. E trahado por wak y compronde e situacion cu e hotel y of compania ta aden cu benta of ocupacion a cai. Pero si den e acuerdo laboral cu e trahado e parti di bonus aki ta poni como un component di su compensacion ta nifica cu e ta conta cu e placa aki. Logicamente e tin cu compronde y tene consideracion di e circumstancianan aki. Pero pa e spera cu 100% di su bonus di fin di aña ta wordo corta NO ta algo cu por argumenta cu e ta rasonabel pa acepta e proposicion. Den e ultimo lunanan aki mayoria trahado a cobra entre 60%-80% di nan salario. Den nos parecer lo por uza e porcentahenan aki tambe como guia pa yega na un ‘corte’ rasonabel di e beneficionan manera bonus di fin di aña cu ta reglamenta den contract. Den caso di contractnan colectivo e sindicato en cuestion lo tin cu delibera cu e dunado di trabou. Kiermen e cambio di parti di e dunado di trabou no mag sosode sin consulta.

Echo ta cu nos leynan ta indica bon cla cu un dunado di trabou no por unilateralmente dicidi pa corta den salario di e trahado of den e ehempel specifico aki e compensacion di bonus di fin di aña regla den contract. E proposicion di e dunado di trabou lo mester wordo papia pa yega na un areglo cu e trahado. Dado caso e interesnan lo wordo poni den balansa. Si e dunado di trabou no a consulta e trahado y a corta den e compensacion automaticamente lo tin cu paga e trahado bek y si e suma ta grandi lo por haci areglo di pago cu e trahado.

Scirbi pa studiantenan di ley:
Minorca Martis LL.B
Gerick Croes LL.B, B.Ec