Parlamentario di POR, Alan Howell ta inidica cu despues di e a scucha e declaracionnan di Prome Minister, e por bisa cu e perspectivanan ta positivo pa loke ta e desaroyo economico na San Nicolas.
E ta referi aki na e ultimo informenan relaciona cu e refineria. A wordo informa cu na e momentonan aki tin 10 compania cu ta interesa den desaroya e refineria como tal y otro 6 compania a mustra interes pa realisa algo diferente riba e tereno.
Sin duda algun, esaki ta demostra cu a pesar di e crisis cu mundo ta bibando aden, tin un total di 16 compania cu a mustra interes den realisa inversionnan miyonario na e parti pariba di nos isla y tin confiansa den e desaroyo di Aruba.
Awo e siguiente paso lo inicia, cual ta esun di screening intenso, mientras cu esnan interesa lo por bin Aruba pa inspecciona e sitio y tambe haya acceso na mas datonan for di gerencia di FDA.
Alan Howell por a compronde cu pa fin di november lo tin un mihor bista riba cua di e companianan interesa lo bira e operador of e inversionista den area di San Nicolas.
Banda di esaki por a scucha tambe cu RDA ta kedando cla cu e contrato pa loke ta e leasemento di e tankinan di e refineria, lo cual ta significa cu pronto gobierno lo por haya entrada pa cu esaki.
Concluyendo Alan Howell a bisa cu segun informenan y confiando cu henter e proceso bay manera pronostica, e inversion aki lo por significa un impulso di 16% y 18% pa 2021 y 2022 respectivamente den nos economia y esaki proveniente for di inversionnan realisa den e area di San Nicolas.