Homber haya morto den su cura di cas, polis a haci investigacion na e sitio. Despues a confisca e curpa pa haci autopsia pa asina deduci si ta trata di un crimen of morto natural.
Mahuma: Diadomingo algo prome cu 11’or y mey, presencia di polis a wordo pidi na un cas pa un persona cu ta benta den su cura di cas y no lo ta dunando senjal di bida. Na yegada enberdad a topa cu un persona masculino y tur cos tabata mustra cu e no tabata duna senjal di bida mas. Mesora a pidi pa presencia di tur instancia concerni, recherche, departamento tecnico, slachtofferhulp y Dokter pa presenta na e sitio. E dokter cu a constata morto,no a mira nada cu por ta trata di un crimen. E curpa a wordo confisca pa mas investigacion, pa descarta cualke duda.
Informacion cu ta circulando rond ta bisa cu e homber E.K., un rato prome lo hay’e den un discussion fuerte cu un miembro di famia. Tambe te hasta a wordo bisa cu nan lo a dal’e cu un baranca y a bay for di e sitio, pero esaki no por a wordo confirma pa autoridad.
Riba Social Media un ruman di e defunto a publica cu su ruman lo a wordo asesina pa su propio yiu muhe y su pareha. Un otro informacion cu nos a ricibi cu e pareha aki a wordo hiba of mester a presenta na Warda di Polis.
Te na e momentonan aki Prensa no a ricibi nada oficial di parti di autoridad
Resultado di autopsia lo mester confirma si e persona aki a fayece enberdad di un morto natural of di un crimen.
