Avenida Nelson O. Oduber(Ex Sasakiweg) – Diadomingo atardi pa mas o menos 5’or alarma a wordo bati pa un accidente hopi serio basta panort di Super Food Plaza, unda un auto a bolter.
Habitantenan den e area a conta cu nan a scucha un zonido masha duro, y mesora nan a sali y por a mira cu ariba e caminda un accidente serio a caba di sosode.
Mesora unidadnan policial a sali direccion di e accidente. Na yegada nan ta constata cu un Hyundai Tucson bayendo zuid pues ariba e liña pa bay Playa a pasa over.
Mesora a pidi Materiaalwagen debi cu e persona lo a keda pega den e auto.
Como 10 pa 20 meter mas panort por a mira e motor completo benta y restonan di e vehiculo.
Mas panort tawata tin tambe tres otro vehiculo cu a sufri daño y cu di un of otro manera tawata envolvi durante cu e auto tawata bolter.
Nos a papia cu un dama cu tawata den su auto bayendo nort, momento cu e la mira e Hyundai Tucson tawata bolter varios biaha biniendo den su direccion.
E la sigui conta cu si e tawata ariba e banda links bayendo nort e lo no sobrevivi pa conta. Segun e tawata manera un pelicula di horror, mirando un auto flip varios biaha asina.
Na yegada di unidadnan di rescate nan a logra saca e chauffeur masculino y hinke mesora den ambulance. Debi cu no por a bay nort polis mester a escolta e ambulance den verboden richting pa asina e bay Hospitaal.
Mas panort Polis di trafico a papia cu doño di e otro tres vehiculonan cu lo a sufri un of mas daño durante e accidente. Camina a wordo habri despues di 7’or ora cu takelwagen a move e auto y DOW a haci e caminda limpi.
