Home Politics Parlamentario Shailiny Tromp-Lee: Ley di financiamento di partido politico a bira realidad

Parlamentario Shailiny Tromp-Lee: Ley di financiamento di partido politico a bira realidad

SHARE

Awe, 10 di September 2020, Parlamento a trata e ley di financiamento di partidonan politico, un ley di iniciativa di MEP. Coleganan Edgard Vrolijk y Rocco Tjon a defende e ley di iniciativa. Mi ta sumamente orguyoso cu e dia a yega cu porfin Parlamento a trata e ley importante aki. Un ley cu hopi a papia di dje, presenta mocion, tin a traha y presenta un concepto pero nunca e proceso completo a keda encamina mucho menos keda trata y aproba den sala di Parlamento. Danki na MEP esaki a bira un realidad.

Ley di financiamento di partido politico
Den su esencia e ley aki ta reglamenta con Partidonan Politico mester mantene nan administracion pa asina por tin transparencia. Alabes e ta reglamenta cuanto placa un partido politico mag di haya como donacion y tambe cuanto un candidato politico mag di haya como donacion of sponsor. E ta garantisa tambe cu tur e informacion aki mester bira publico. Asina di berdad por frena “patronahe politico”.
A percura pa incorpora den e ley un comision nobo y independiente cu ta bay controla e exigencianan cu e ley aki ta pone riba partidonan politico y e candidatonan. Y e comishon aki tambe ta haya e autoridad pa duna sancionnan si no cumpli cu esakinan.

Conclusion
E ley aki sigur lo bay preveni casonan manera Roberto Rincon cu a sponsor Mike Eman $50.000 lo por pasa mas. Aprobando e ley aki awe sigur nos ta aporta na realisacion di e vision di Gabinete Wever-Croes pa loke ta fortifica integridad y bon gobernacion. Sigur no menos importante ta echo cu poco poco ta cuminsa cambia politica en general na Aruba y e manera con campañanan electoral ta wordo organisa y hiba. Asina e enfoke por keda dirigí mas riba contenido di porgramanan y menos riba material y fiestanan politico!

Pa finalisa mi kier a duna un pabien special na mi coleganan Edgard Vrolijk y Rocco Tjon cu a traha duro pa haci posibel cu awe nos por a trata y aproba e ley aki.