Home Politics Parlamentario Edgard Volijk: Unanimamente a pasa e ley di Ombudsman

Parlamentario Edgard Volijk: Unanimamente a pasa e ley di Ombudsman

SHARE

Awe parlamento di Aruba a aproba e ley di iniciativa di Ombudsman y Kinderombudsman unanimamente. Un ley cu a cuminsa su proceso na 2005 y awe despues di 15 aña ta bira un realidad y sigur mi ta orguyo di por a forma parti di e comision cu a percura pa termina e trayectoria largo aki y awo Aruba den Reino tin su Ombudsman.

Vision di Gabinete Evelyn Wever-Croes
Na momento di formacion di Gobierno nos Minister President Evelyn Wever- Croes a pone den e programa di gobernacion “Hunto pa Aruba” cu un di e prioridad ta percura pa e ley di Ombudsman aki por ser implementa. Sigur un ley hopi importante pa reenforsa nos democracia. E ley aki ta dirigi pa proteccion di e ciudadano contra violacion di nan derechonan, proteha e cuidadano di abuso di poder (gobierno y dunadornan di trabao), decisionan unfair y sigur mal administracion cu ta haci cu e ta ser perhudica. Y asina e ciudadano humilde cu no por paga un abogado sigur tin un entrada unda cu su derechonan por ser respeta.

Ta sigui reenforsa y trece cambio den e pais aki
E siguiente ley cu lo ser trata ta e ley di financiamento di partidonan politico unda cu cada partido politico y sigur candidato tin di declara di unda su fondonan pa campaña electoral a bin y asina pueblo por tin mas speransa cu porfin lo bin cambio den e manera desproporcional di core campaña. Y pronto lo drenta parlamento e ley di screening di ministernan pa ser trata.
Nos ta riba e bon rumbo pa purba cambia e mentalidad pa locual ta votacion. Bo no por bay bek den pasado pero si siña di locual a bay robes y percura pa crea e plataforma pa trece cambio di rumbo pa nos dushi isla Aruba. Kisas nos no lo wak awo, pero den un futuro e dos leynan aki, lo marca enormemente e rumbo con ta hiba politica y sigur ta haci cu ministernan ta pensa dos biaha cada accion y banda di esaki e lo yuda crea un poblacion cu lo bay urnanan electoral mas critico.