ORANJESTAD Aruba, 12 september 2020. Diabierna anochi diferente unidad di “Task Force bedrijven” consistiendo di KPA y DWH a subi caya pa intensiva e control nesesario relaciona cu maneho di e brote di covid-19 na Aruba.
Banda di a constata cu ainda tin hopi hende inresponsabel pa cu nan propio salud y pa cu salud di nan famia, tambe a cera establecimiento y duna multa na algun.
Lugarnan cu a wordo cera ta entre otro Yen Yen unda a bin constata durante control mas cu 10 hende sinta na mesa. Tambe na e rumshop di Chaly na Sero Patrishi a bin constata hendenan trahando sin Greencard.
Lugarnan cu a haya multa ta entre otro La Oficina unda a bin constata cu nan empleado no ta uza tapa boca (mondkapje). Tambe Cas di Casuela, Well Well Bar Restaurant y
Southbeach a haya multa pa ta habri despues di 23:00uur.
Controlnan di “Task Force” lo sigui tuma lugar intensivamente durante siman, weekend, di dia y anochi. Es cu no ta cumpli pa yuda Aruba reduci e cantidad di casonan di covid-19 ta core e risico di haya un multa of wordo cera.
