Diaranson 9 september 2020 den un reunion publico a trata e ley di iniciativa di Parlamento; Landsverordening Ombudsman. Un ley cu mas o menos 15 aña a keda pendiente. E ley a keda aproba y pronto lo wordo realisa door di gobierno di Aruba. Gobierno lo establece un institucion Ombudsman na unda mucha y hende grandi por acudi cu nan preocupacionan.
Ombudsman y su importancia den comunidad
E palabra ombudsman sigur pa hopi den nos comunidad no ta conoci. Un palabra mas simpel y cu sigur hopi lo compronde ta cu e ombudsman ta bira e Defensor di pueblo. Un ombudsman su tarea primordial ta pa brinda protecion/ayudo pa e cuidadano pa por haya su derecho.
Na banda di e ayudo huridico un ombudsman ta duna e ciudadano oido, e balor, e sosten y e atencion pa su situacion. Un ombudsman no ta partidiario. Esaki ta pone cu ta traha cu transparencia y husticia. Intervencion door di e ombudsman lo por yuda mediante comunucacion mas eficiente sin tin cu bay dilanti un huez, y mas cu claro e ta gratis.
Proceduranan por crea confusion pa persononan. Instancianan di gobierno tin nan leynan y maneho. Pero esaki ta causa cu ta dificil pa e ciudadano sa cua caminda pa bay ora nan ta sinti nan di un manera of otro perhudica of segun e persona no corectamente trata door di gobierno of un instancia semi-gubernamental. E ombudsman ta esun mediador den esaki.
Conclusion
Pa hopi persona ta dificil sa unda pa bay y door di esaki mes no ta haci uso di nan derecho. Pero dentro di poco, tur hende tin acceso na ombudsman. E ta duna tur hende e trankilidad cu tin un “Defensor di Pueblo” cu tey pabo. Mi a sostene e ley aki y ta convenci cu gobierno lo bay ehecuta e bureau di Ombusdman aki mas pronto cu ta posibel.