Home Politics Parlamentario Benny Sevinger Gobierno ta pidi union pero tur hende ta...

Parlamentario Benny Sevinger Gobierno ta pidi union pero tur hende ta mira cu no tin union den gobierno

SHARE

 

 

Totalmente decepciona y hopi babuca miembro di fraccion di AVP, Benny Sevinger a keda despues dia  scucha e discurso di Gobernado na apertura di Aña Parlamentario.

El a mustra cu pa tradicion ta asina cu gobierno pa medio di Gobernado, ta gobierno ta mustra con leu e ta cu ehecucion di su plan di gobernacion, kico nan a haci caba y kico nan ta bay haci pa asina duna un perspectiva na comunidad, kico ta spera tur hende den futuro pero na mes momento kico gobierno a cumpli cune pa loke el a priminti pueblo cu e lo ehecuta.

“Lamentablemente mi por a tuma nota di un discurso sin ningun pero ningun contenido y esaki ta di lamenta ya cu si gobierno a priminti pueblo asina hopi cos durante di campaña, pueblo a spera di scucha un lista di tur loke gobierno a logra den e añanan cu a pasa.

Esaki ta e problemanan cu gobierno ta confrontando na e momentonan aki y bisa e solucionnan cu gobierno tin pa atende y soluciona e problemanan aki.

Absolutamente nada no a bin dilanti den e mensahe di gobernado y hasta por a ripara na cara di gobernado, cu su persona no tabata mucho contento cu e contenido di e mensahe aki.

Ora cu analisa tur e discursonan di pasado cu a ser hiba durante di ocasionnan similar, e discurso die  aña aki tabata e discurso di mas malo cu mi a yega di scucha y sigur esun di mas cortico tambe.

Ora cu analisa e contenido di e mensahe di gobierno cu Gobernado a trece, pueblo ta spera cu gobierno a analisa tur ministerio pero no tabatin un liña notabel cu no a informa riba ministerionan manera di economia, di turismo, di enseñansa, dunando informacion riba tur loke gobierno a logra den e ministerionan aki y otronan.

Tampoco a bin dilanti kico gobierno ta bay haci den tempo cu ta bin, con lo atende cu e ministerionan aki y lamentablemente e unico cosnan cu por a scucha den e mensahe di gobierno, tabata cu mester tin unidad na Aruba pa asina por confronta e problemanan cu tin.

Esaki ta pone tur hende para un rato y puntra ta kico ta e mensahe cu gobierno kier manda pa comunidad y con gobierno kier pidi comunidad pa ta uni cu gobierno, pero no ta duna pueblo claridad na comunidad y tampoco ta traspasa esaki dor di gobierno su accionnan pa asina comunidad mira cu tin unidad of nos mester unidad den pais Aruba.

Pa cuminsa den bo propio gabinete tin minister cu a entrega denuncia contra coleganan  na Ministerio Publico y e propio Prome Minister riba presion di Hulanda, a entrega keho na Ministerio Publico contra un ex Minister di su gabinete, Otmar Oduber.

Minister ta subi avion bay sin duna cuenta na Ministerraad riba kico el a bay haci, despues cu el a caba di yega, despues cu el a caba di haci henter un show den parlamento y no tin un unidad den e gobierno aki.

Un otro minister cu nan a entrega keho contra dje,  no ta bin atende Ministerraad ya cu su colega ta sinta eyden y e ora ta lanta e pregunta ta kico ta e mensahe cu gobierno ta manda pa pidi pa unidad den comunidad aki. Unda cu bo bay rond e isla por tende di e caos aki caminda no tin unidad ni den gobierno,” Benny Sevinger miembro di fraccion di AVP a declara.