Ultimo dianan riba social media tin diferente mensahe tocante trahadornan di Wardacosta di Karibe. E mensahenan ta ser dirigi prinisipalmente na e trahadornan di Kustwacht su steunpunt na Aruba caminda ku tin hasta menasa direccion di e trahadornan.
Wardacosta ta lamenta sinseramente ku e mensahenan riba social media ta tacha e trahador di Wardacosta personalmente y ta danja e reputaccion di Wardacosta sin un base funda.
Wardacosta ta un organisacion profesional ku ta traha abase di regulacionnan local y ta mantene ordu publico abase di su Rijkswet Kustwacht. E trabounan di Wardacosta ta ser ehecuta na un manera integro, profesional y sin hasi diferencia den persona. Directiva di Wardacosta ta para clave tras di su trahadornan y no ta asepta ningun sorto di menasa den direccion di su trahador ku ta hasi nan trabou na un manera digno.
Wardacosta ta e partner di seguridat riba laman pa Aruba y lo keda mantene ordu publico y controlnan riba laman abase di leynan vigente local.