Oranjestad – Aruba; Desde aña 2018 Sociaal Crisis Plan (SCP) ta trahando hunto cu 20 diferente socio den sector social, hudicial, enseñansa y salubridad cu e meta pa fortifica e systema nacional di proteccion di mucha y hoben aki na Aruba.
E prome raportahe di aña 2020 ta indica cu 97% di e 31 proyectonan activo a conoce progreso. Locual cu a destaca ta cu e aña aki, a habri e Centro Pa Hoben y Famia, cu ta activo desde luna di juli 2020. Den luna di september 2020 lo bay haci un apertura oficial. Tambe a mira progreso total den e preparacionnan den e 4 sectornan; Hudicial, Enseñansa, Salubridad y Social pa locual ta trata e Ley di Codigo di Proteccion. Ta premira cu e Ley aki lo wordo finalisa pa fin di aña 2020. Alabes, desde 1 di september 2020 a inicia e preparacion pa cuminsa establece e Family Justice Center, cu lo ta e instituto cu lo bay atende cu tur caso di delito contra mucha y hoben, muy en especial e abuso sexual di mucha aki na Aruba.
E vision di Sociaal Crisis Plan ta pa sigui desaroya den un Plan Social Nacional Aruba (2021-2031). E base di e Plan Social Nacional ta keda e 7 “inspire strategies” internacional di Unicef. Caminda ta boga pa sigui traha den e cuadro multi-sectoral den un angulo mas holistico y integral. Ta keda enfoca ariba trahamento hunto entre departamentonan pa asina yega na un solucion di e problematica na un forma mas efectivo y eficiente. E meta principal di e Plan Social nacional ta pa soluciona structuralmente y eficientemente e problematica di violencia contra nos muchanan y hoben aki na Aruba.
Pa mas informacion tocante proyectonan di Sociaal Crisis Plan por tuma contacto cu 528-1100 \ 528-1189 of por manda nos un mensahe riba nos Facebook page @scparuba. Pa documentonan di Sociaal Crisis Plan, por manda nos un email na [email protected].